Loyiha Meyji universiteti huzuridagi PorMedTec startapi tomonidan amalga oshirilmoqda. Kompaniya hozirdanoq genetik modifikatsiya qilingan cho‘chqalarni ko‘paytirish ishlarini boshlagan.

PorMedTec rahbariyatining taʼkidlashicha, maqsad — cho‘chqa buyragini insonga transplantatsiya qilish usulini og‘ir buyrak etishmovchiligiga duch kelgan bemorlar uchun insondan insonga buyrak ko‘chirib o‘tkazish va dializ bilan bir qatorda asosiy davolash usullaridan biriga aylantirish.

Loyiha tegishli idoralar tomonidan maʼqullangan taqdirda, klinik sinovlar Yaponiyaning bir vaqtning o‘zida ikki shifoxonasida o‘tkaziladi. Bu mamlakatda hayvondan insonga buyrak transplantatsiyasi bo‘yicha o‘tkaziladigan ilk klinik sinovlar bo‘lishi kutilmoqda.

Kompaniya 2030 yilda hayvonlardan insonlarga organ transplantatsiyasi bo‘yicha shartli ruxsatnoma olishni, 2033 yilga kelib esa cho‘chqa buyragini insonga ko‘chirib o‘tkazishni standart davolash usullaridan biriga aylantirishni maqsad qilgan.

Loyiha doirasida Yaponiyaning PorMedTec startapi AQShning eGenesis Inc. biotexnologik kompaniyasi bilan hamkorlik qilmoqda. Ushbu kompaniya genetik jihatdan o‘zgartirilgan cho‘chqa hujayralarini etkazib bermoqda.

Transplantatsiya qilingan organning inson organizmi tomonidan rad etilish xavfini kamaytirish maqsadida cho‘chqa genomiga 69 ta genetik o‘zgartirish kiritiladi. Bu texnologiya kelajakda buyrak etishmovchiligi bilan yashaydigan millionlab bemorlar uchun donor organlar tanqisligi muammosini hal etishga xizmat qilishi mumkin.