Uchrashuv davomida Rossiya Federatsiyasi hududida mehnat faoliyatini amalga oshirayotgan O'zbekiston Respublikasi fuqarolarining huquqlari va qonuniy manfaatlarini himoya qilishga doir dolzarb masalalar atroflicha muhokama qilindi.

Muzokaralarda O'zbekiston tomonidan Rossiya Federatsiyasining turli hududlarida faoliyat yuritayotgan O'zbekiston Respublikasi bosh konsullari ishtirok etdi. Bu esa joylardagi amaliy tajribani inobatga olgan holda ko'tarilgan masalalarni aniq va chuqur tahlil qilish imkonini berdi.

Rossiya tomonidan esa diplomatik vakolatxonaning konsullik bo'limi rahbariyati, migratsiya masalalari uchun mas'ul xodimlar hamda huquqni muhofaza qiluvchi organlar vakillari qatnashdi.

Uchrashuvda O'zbekiston tomoni migratsiya tekshiruvlari va reyd tadbirlari o'tkazilayotgan jarayonlarda O'zbekiston Respublikasi fuqarolarining — ham qonunga rioya qilayotgan, ham migratsiya qonunchiligini buzgan shaxslarning — huquqlari va inson qadr-qimmatini kamsitishning har qanday shakliga yo'l qo'yilmasligi printsipial ahamiyatga ega ekanini alohida ta'kidladi.

Tomonlar migratsiya jarayonlarini tartibga solish, shuningdek Rossiya Federatsiyasi hududida O'zbekiston Respublikasi fuqarolarining qonuniy mehnat faoliyati uchun qulay shart-sharoitlar yaratishga qaratilgan pragmatik va o'zaro hurmatga asoslangan muloqotni rivojlantirishga intilishini tasdiqladi.