Ҳолат Жанубий Фарғона каналининг Булоқбоши тумани Ширмонбулоқ ҳудудан оқиб ўтган қисмида рўй берган. Аниқланишича, Фарғона каналига текстил корхонаси томонидан матоларга ранг берувчи кимёвий модда оқизилган. Оқибатда сувнинг таркиби ўзгарган.

Ҳеч шубхасиз, Жанубий Фарғона канали водийнинг юраги. Минглаб хонадонлар, қушу жониворлар, қишлоқ хўжалиги, табиат шу канал суви билан тирик. Аммо айрим ноинсон кимсаларнинг бу қилмиши касрига бутун бошли канал, экология катта зарар кўрди.

Ҳозирча мазкур ҳолатга оид расмий муносабатда экология масъул ходимлари томонидан муаммо бартараф этилгани, ҳолат Андижон вилоят прокуратураси томонидан назоратга олингани айтилмоқда.

Ҳали каналдаги балиғу, жониворларнинг нобуд бўлгани ҳисоб-китоб қилингани йўқ.

Ўзи шундоқ ҳам экологик муаммолар билан юзма-юз келиб турилганда, қўрқмасдан каналга кимёвий сувни оқизган корхонага жиддий чора кўриш керак. Акс-ҳолда бундай ҳолат яна такрорланмаслигига ҳеч ким кафолат бера олмайди.