Президентимиз тиббиёт ходимлари билан ўтказилган очиқ мулоқотда аҳолига сифатли тиббий хизмат кўрсатиш имкониятини кенгайтириш, замонавий тиббиёт асбоб-ускуналарини ўзимизда ишлаб чиқаришни йўлга қўйиш орқали импортни қисқартиришга доир қатор кўрсатмалар берган эди.

Куни кеча Ўзбекистонда илк бор маммогроф ускунаси ишлаб чиқарувчи корхона фаолияти билан яқиндан танишиш мақсадида ушбу корхонага пресс-тур ташкил этилди.

“Юқори технологик рақамли рентген ва маммограф тизимлари” ишлаб чиқарувчиси бўлган маҳаллий “ТСМТ” корхонаси замонавий ускуналар билан жиҳозланган бўлиб, доимий электр қувватисиз ишлаш имкониятига эга бўлган, ҳаракати чекланган беморларни экстра рентген ташхизлаш учун рақамли рентген ускунасини ҳам ишлаб чиқармоқда.

Кўкрак бези саратони сўнгги йилларда мамлакатимизда нисбатан кўпайгани бироз ташвишланарли. Энг ёмони ушбу касалликдан беморлар сўнгги босқичда хабар топмоқда. Касалликни эрта босқичларда аниқлаш учун сўзсиз мазкур хасталикни эрта диагностика қилиш зарур.

— Юртбошимиз томонидам фармсаноатга катта эътибор қаратилмоқда. Биз юқори технологик рақамли рентген ва маммограф тизимлари ишлаб чиқарувчиси бўлган маҳаллий “ТСМТ” корхонасини Ўрта Осиёда ягона бўлиб қурдик! Нафақат маммограф тизимларини, балки сунъий интеллектларни ҳам ишлаб чиқаришни йўлга қўйдик. Кунига 150-180 нафаргача текширувларни амалга оширса бўлади — дейди “ТСМТ” корхонаси раҳбари Улуғбек Тоҳирий.

Кўкрак бези саратонини аниқлайдиган ускуналар олдин тўлиқ импорт бўлиб юртимизга кирар эди. Эндиликда Европа маҳсулотларидан қолишмайдиган ускуналарни ўзимиз ишлаб чиқарилмоқда. Қолаверса, корхона йилига 400 та тиббиёт тизимларини ишлаб чиқариш имониятига эга.

Феруза Раҳимова,

ishonch.uz