Бугун Тошкент фотосуратлар уйида Адлия вазирлиги ва Ўзбекистон ногиронлар жамияти билан ҳамкорликда “Мафтункор ранглар жилоси” расмлар кўргазмасининг очилиш маросими бўлиб ўтди. Унда ижод намуналари намойиш этилаётганлар – имконияти чекланган болажонлар – 7 ёшдан 17 ёшгача. Уларнинг ижодий ишларини кузатаман: бири Қорақалпоғистондаги Оролни, бири оиласини, яна бири юртимиз табиатини чизган ва расмлари кўргазмага қўйилганидан фахрланиб турибди. Энг муҳими, ҳар бир тасвирда болаларнинг ички гўзал олами, ҳис-туйғулари ва қалби акс этган.

– Сиз бу расм орқали одамларга нима демоқчи бўлдингиз? – деб сўрайман, инида турган лайлак расмини чизган, ўзини Юнусобод туманидаги 88-мактабнинг 8-синф ўқувчиси деб таништирган Зайтун Абдужалиловадан.

– Биз табиатга меҳрибон бўлишимиз, уларга қишда совуқда қолиб кетмаслиги учун ин қуриб беришимиз керак, – дейди у.

Жасур Аҳмаджонов эса ўз оиласини дарахт тимсолида тасвирлабди. “Мен онамни, акам ва опамни яхши кўраман. Бу расмда шуни ифодалаганман” – дейди у бизга ўзи ҳақида гапирар экан. Расм чизишни тўгаракда ўрганган Жасур мактабнинг 10- синфида ўқиши билан бирга, Ўзбекистон ногиронлар жамиятининг Сергели Янгиҳаёт туманлараро бўлимининг фаоли ҳам экан.

Кўргазмада 2019-2023 йиллардаги расмлар мусобақасида ғолиб ва иштирокчи бўлган 70 нафар имконияти чекланган болажонлар томонидан чизилган 204 та расм намойиш этилди.

– Ҳозирги кунда ушбу кўргазма доирасида ҳомийлардан жами 70 миллион сўм пул маблағи келиб тушган бўлиб, улар 3 декабрь – “Халқаро ногиронлар куни” муносабати билан, мазкур танлов иштирокчиларини қўллаб-қувватлаш мақсадида 1 миллион сўмдан тақсимлаб берилади, – дейди Адлия вазирлиги матбуот котиби Севара Ўринбаева. – Шунингдек, кўргазма давомида қўшимча ҳомийлик маблағлари келиб тушадиган бўлса, 70 нафар ногиронлиги бўлган ёшлар орасида тенг тақсимланиши режалаштирилган.

Зебо НАМОЗОВА,
Ishonch.uz