Ушбу саволга Соғлиқни сақлаш ходимлари касаба уюшмаси республика кенгашининг Хоразм вилояти бўйича меҳнат ҳуқуқ инспектори Расулбек Аллаберганов жавоб беради.

Меҳнат шартномасини ўзгартириш қонунчиликка мувофиқ равишда иш берувчининг буйруғи ва томонлар ўртасида тузилган ёзма қўшимча келишув асосида амалга оширилади. Ходимни доимий бошқа ишга ўтказиш, меҳнат шартларини ёки иш жойини ўзгартириш каби ҳолатларда, аввало, меҳнат шартномасига тегишли ўзгартишлар киритилиб, қўшимча келишув имзоланиши шарт. Мазкур келишув камида икки нусхада расмийлаштирилиб, ҳар икки томон томонидан имзоланади ва унинг бир нусхаси ходимга топширилади.

Шундан сўнггина иш берувчи томонидан тегишли буйруқ чиқарилиб, у қўшимча келишув мазмунига тўлиқ мос бўлиши ва ходимга имзо қўйдирган ҳолда эълон қилиниши лозим.

Ходим соғлиғининг ҳолатига кўра ходимни вақтинча бошқа ишга ўтказиш, ҳомиладор аёлни, шунингдек икки ёшга тўлмаган боласини парваришлаётган ота-онадан бирини (васийни) уларнинг аввалги ишни бажариш имконияти бўлмаган тақдирда вақтинча бошқа ишга ўтказиш ҳақида буйруқ чиқариш учун уларнинг аризаси ва тиббий хулоса асос бўлади.

Иш берувчининг ташаббусига кўра ходимни вақтинча бошқа ишга ўтказиш тўғрисида буйруқ чиқариш учун ишлаб чиқариш зарурияти ёки бекор туриб қолиш фактларининг мавжудлиги асос бўлади. Ходимни вақтинча бошқа ишга ўтказиш меҳнат шартномасида акс эттирилмайди.
Ходимни бошқа иш берувчига вақтинча хизмат сафарига юбориш ҳақида буйруқ чиқариш учун ходим ҳамда мазкур ходимни вақтинча хизмат сафарига юборган иш берувчи билан келишувга кўра ходим қайси иш берувчига хизмат сафарига юборилган бўлса, ўша иш берувчи ўртасида тузилган алоҳида муддатли меҳнат шартномаси асос бўлади.