Президент Шавкат Мирзиёев ички ишлар органлари ходимлари ҳамда фахрийларини касб байрами – Ўзбекистон Республикаси ички ишлар органлари ходимлари куни билан табриклади.

Давлат раҳбари ўз табригида тизим ходимларининг зиммасидаги муҳим вазифаларни эътироф қилиб, сўнгги йилларда ички ишлар органларини чинакам халқчил тузилмага айлантириш йўлида қатор ислоҳотлар амалга оширилаётганини таъкидлайди.
“Биз Янги Ўзбекистон шароитида “Барча ислоҳот ва ўзгаришлар – инсон қадрини юксалтириш учун” деган эзгу тамойилга содиқ қолган ҳолда, шу йўлда бошлаган ишларимизни янги босқичга кўтаришимиз зарур. Бу борада ўтган даврда жиноятчиликка қарши курашиш соҳасида яратилган мустаҳкам ҳуқуқий базага таянамиз”, – дейди Мирзиёев.

Шунингдек, табрикда ички ишлар органлари соҳасига рақамли технологиялар, хорижий мамлакатларнинг илғор тажрибаларига асосланган замонавий иш юритиш воситалари, сунъий интеллект ёрдамида фаолият кўрсатадиган ахборот-маълумот тизимлари жадал татбиқ этилаётгани ҳамда жамоат жойларини онлайн кузатиш, мурожаатларни масофадан туриб қабул қилиш, ҳуқуқбузарликларни инсон омилисиз қайд этиш амалиёти бу борадаги муҳим қадамлардан экани қайд этилади.

“Ички ишлар органлари фаолиятини такомиллаштириш, аҳоли осойишталигини таъминлашга қаратилган ишларимиз бундан буён ҳам изчил давом эттирилади.
Хусусан, ички ишлар органлари томонидан кўрсатилаётган давлат хизматларининг 80 фоизи электрон шаклга ўтказилиб, тизимда бюрократия ва фуқароларни сарсон қилиш ҳолатлари бартараф этилади. Ҳар бир фаолият йўналиши бўйича ижтимоий фикрни ўрганиш ва жамоатчилик томонидан мониторинг қилиб бориш амалиётини “маҳалла – туман – вилоят – республика” тамойили асосида ташкил этиш чораларини кўришимиз лозим.

Мухтасар айтганда, ички ишлар тизимидаги ислоҳотларимизнинг амалий натижасини соҳанинг ҳар бир ходими, биринчи навбатда, халқимиз ўз кундалик ҳаётида сезиши шарт”, – дейди давлат раҳбари.

Президент табрик сўнгида соҳа ходимлари ва фахрийларига фидокорона меҳнатлари учун самимий миннатдорлик билдиради.

“Сизларни бугунги қутлуғ байрам билан яна бир бор чин дилдан табриклаб, барчангизга мустаҳкам соғлиқ, оилавий бахт, масъулиятли хизматингизда янги муваффақиятлар тилайман”, – дейди Шавкат Мирзиёев.