82/81-сонли “Тошкент- Сариосиё-Тошкент” йўналишида алоҳида йўловчи поезд ҳаракати йўлга қўйилди.
“Ўзтемирйўлйўловчи” АЖ матбуот хизмати хабарига кўра, ушбу қатнов Президент Шавкат Мирзиёевнинг 2023 йил 16-17 ноябрь кунлари Сурхондарё вилоятига ташрифи давомида ўтказилган тақдимотлар ва мулоқотлар жараёнида берилган топшириқлар бўйича йўлга қўйилган.

Поезд 2023 йилнинг 10 декабрь санасидан ҳаракатни амалга оширади.

Маълумот учун, ҳозирги кунда “Тошкент-Термиз-Сариосиё” йўналишида ҳар куни бир марта ҳаракатланадиган йўловчи поезд ҳаракати мавжуд бўлиб, ушбу поезд ажралмас таркиб билан ҳаракатланади.

“Ушбу поездни иккита йўналишда алоҳида қатновларини ташкил этиш йўловчи ташишлар сонини икки баробарга оширилишига хизмат қилади”, – дейилади хабарда.

Йўналишлар қуйидаги жадвал асосида ҳаракатланади:
82-сонли “Тошкент-Сариосиё” йўналиши: Тошкент 21:40 — Сариосиё 12:08
81-сонли “Сариосиё-Тошкент” йўналиши: Сариосиё 19:13 — Тошкент 11:47
80-сонли “Тошкент-Термиз” йўналиши: Тошкент 19:50 — Термиз 9:40
79-сонли “Термиз-Тошкент” йўналиши Термиз 17:43 — Тошкент 8:53