Савол: Пенсионер ходим вафот этса ташкилот ҳам "Дафн пули" тўлаши шартми?

Саволга ҳуқуқшунос Муҳаммадамин Каримжонов жавоб беради.

- Пенсионер вафот этган ой учун олинмай қолган пенсия пули кўрсатиб ўтилган оила аъзоларига ушбу ой учун тўлиқ тўланади.

Масалан, пенсионер 1 ноябр куни вафот этди. Ҳали ноябр ойи пенсиясини олмаган. 1 ноябр санасида вафот этган пенсионернинг ноябр ойи пенсияси оила аъзоларига тўлиқ тўлаб берилади.

Пенсионер вафот этган тақдирда унинг оиласига ёки пенсионернинг дафн маросимини ўтказган шахсга пенсияни ҳисоблаш базавий миқдорининг тўрт баробари миқдорида дафн этиш нафақаси тўланади.

Бугунги кунда пенсияни ҳисоблаш базавий миқдори 428 минг сўм. Шунда 428 минг*4=1 миллион 712 минг сўм “дафн пули” тўлаб берилади. Солиқ кодекси 369-моддаси 1-қисми 7-бандига кўра, давлат пенсиялари, қонун ҳужжатларида белгиланган нафақалар, бундан вақтинча меҳнатга лаёқацизлик нафақаси (оиланинг бетоб аъзосини парвариш қилиш бўйича нафақа) мустасно жами даромад таркибига киритилмайди.

Яъни содда қилиб айтганда, “дафн пули” тўлиқ қўлга тегади, унга солиқ солинмайди.

Кўрсатиб ўтилган пуллар, уларни олиш учун пенсионер вафот этганидан кейин 60 кун ичида мурожаат этилган тақдирда тўланади.

Яъни 60 кундан кейин мурожаат қилинган боълса, юқорида кўрсатиб ўтилган пуллар яъни пенсия ва “дафн пули” тўланмайди.

Пенсионер вафоти муносабати билан "дафн пули" давлат буджетдан тўланади.

Агар ташкилотнинг ички ҳужжатларида ходим ёки унинг яқин қариндошлари вафоти муносабати "дафн пули" назарда тутилган бўлсагина, ташкилот ҳам "дафн пули" тўлаши керак. Унинг миқдори ташкилот ички ҳужжатларда белгиланган бўлади. Агар ташкилот ички ҳужжатларида "дафн пули" назарда тутилмаган бўлса, у ҳолатда ташкилот бу тўловни тўлашга мажбур эмас.