Фарғона шаҳрида яшовчи 40 ёшли шахс бошчилигидаги 34 нафардан иборат уюшган жиноий гуруҳ Фарғона ва Тошкент шаҳарларида ижарага олинган биноларда “колл-марказ” кўринишида фаолият юритиб келган.

Гуруҳ аъзолари ахборот технологиялари орқали Россия Федерациясида дори воситалари ва биологик фаол қўшимчалар савдоси билан шуғулланувчи ташкилотлар мижозларига оид 70 мингдан зиёд маълумотларни қўлга киритган. Махсус тайёргарликдан ўтган операторлар SIP телефония ва Zoiper дастурлари орқали асосан кекса ёшдаги фуқароларга қўнғироқ қилиб, ўзларини ҳуқуқни муҳофаза қилувчи орган ёки банк ходими сифатида таништирган.

Улар мижозларга гўёки сифатсиз дори воситалари сотилгани учун 500 мингдан 580 минг рублгача товон пули тўлаб берилиши айтилган. Бироқ бунинг учун аввал 5 мингдан 20 минг рублгача “солиқ” тўлаш талаб этилган. Шу тариқа жабрланувчилар тақдим этилган банк карталарига жами 9 млн. 599 минг 561 рубль ўтказиб беришган.

Тергов давомида гуруҳнинг яна 3 аъзоси тегишли лицензиясиз криптовалюта айланмаси билан шуғуллангани ҳам фош этилди. Улар амалдаги қонунчилик талабларини бузган ҳолда қарийб 470 минг АҚШ долларига яқин крипто-актив айланмасини амалга оширишган.
Жиноят ишлари бўйича Ёзёвон туман суди ҳукмига кўра, гуруҳ аъзолари Жиноят кодексининг 168, 243, 278-7 ва 278-8-моддалари билан айбдор деб топилди.

21 нафар шахсга 3 йил 6 ойдан 9 йил 6 ойгача озодликдан маҳрум этиш жазоси тайинланди. Қолган 13 нафарига эса 4 йил 3 ойдан 4 йил 6 ойгача озодликни чеклаш жазоси ҳамда жарималар қўлланилди.