Шаҳарлараро ва халқаро автобусларда ўрнатилган тахографлар ҳайдовчининг иш ва дам олиш вақти, тезлик ҳамда масофани қайд этиб боради. Илгари қурилмани ўчириш учун жавобгарлик бор эди, аммо ундаги маълумотлар асосида меҳнат ва дам олиш тартибини бузиш учун жазо белгиланмаган эди.

Эндиликда ҳайдовчиларнинг белгиланган режимга амал қилмаслиги алоҳида ҳуқуқбузарлик сифатида баҳоланади ва бу ҳолат учун базавий ҳисоблаш миқдорининг 7 баравари миқдорида жарима қўлланади.

Агар ҳайдовчининг иш вақти 9 соатдан ошиб кетса ёки йўналиш 400 км. ва ундан узоқ бўлса, ушбу режимга риоя этилиши Транспорт назорати инспекцияси томонидан назорат қилинади.

Шунингдек, қонунчиликка киритилган ўзгартишлар бир хил ҳуқуқбузарликлар учун турлича жарима қўлланилишига чек қўяди. Йўловчини чиптасиз ташиш ва мажбурий суғурта талабларини бажармаслик бўйича ҳам жарималар аниқ белгилаб қўйилди.

Қонун транспорт тизимида тартиб ва хавфсизликни кучайтиришга қаратилган бўлиб, 2026 йил 10 майдан кучга киради.