Жорий йил 20 ноябр куни имзоланган Президентнинг ПФ-197-сонли Фармони билан айрим норматив ҳуқуқий ҳужжатларга ўзгартириш ва қўшимчалар киритилди.

Жумладан, 2022 йил 18 май куни кучга кирган “Тиббиёт муассасалари ходимларини моддий қўллаб-қувватлаш ҳамда рағбатлантиришни кучайтириш чора-тадбирлари тўғрисида”ги ПФ–136-сон Фармоннинг 1-бандига тегишлича ўзгартириш киритилди.

Унга кўра, 2024 йил 1 январдан Ички ишлар вазирлиги тизимидаги тиббиёт ва фармацевтика ходимларининг (махсус ва ҳарбий унвонга эга бўлган ходим ҳамда ҳарбий хизматчилардан ташқари) ҳам ойлик маошлари оширилади.

Бунда ойлик лавозим маошлари:
• олий ва биринчи малака тоифаларига эга бўлган тиббиёт ва фармацевтика ходимлари учун — 15 фоизга;
• иккинчи малака тоифасига эга бўлган ва тоифага эга бўлмаган, шунингдек, бошқа тиббиёт ва фармацевтика ходимлари учун — 10 фоизга;
• тиббиёт муассасаларининг бошқа ходимлари учун — 15 фоизга оширилади.
Эслатиб ўтамиз, ПФ–136-сон Фармон билан 2022 йил 1 июндан бошлаб фақат давлат тиббиёт муассасалари тиббиёт, фармацевтика ва бошқа ходимларининг ойлик лавозим маошлари белгиланган тартибда оширилган эди.