Имтиҳондан йиқилган набирасини ўз мактабига қабул қилмаган ўзбек ўқитувчиси

Оддий мактаб ўқитувчисининг нималарга қодирлигини кўрсатган "Супер-30" фильми кўпчиликка таниш. Ҳиндистон ижодкорлари томонидан суратга олинган фильм биргина устоз 30 нафар ўқувчининг тақдирини бутунлай ўзгартиргани ҳақида.

Умуман дунёда устозларнинг меҳнати, жамиятдаги ўрнини тараннум этган саҳна ва экран асарлари талай. Куни кеча Ўзбекистонда ҳам мактаб муаллимини миллат қаҳрамони даражасига кўтарган спектакль катта саҳнада намойиш этилди.

Муқимий номидаги Ўзбекистон Давлат мусиқали театрида Ўзбекистон халқ ўқитувчиси, "Элу юрт ҳурмати" ва "Буюк хизматлари учун" орденлари соҳиби, Қоракўл мактаби асосчиси Тўхтамурод Жумаев ҳаёти ва фаолиятига бағишланган "Замон Авлонийси" спектакли премьера қилинди. Қўчқор Норқобил сценарийси, Достон Хақбердиев режиссёрлигида саҳналаштирилган спектакл томошабинларда яхши қизиқиш уйғотди. Жумладан, премьерада қатнашган Тўхтамурод Жумаевнинг ўқувчиси, журналист Ҳусан Тангриев таассуротларини ўз саҳифасида қуйидагича изоҳлаган:

"Адашмаётган бўлсам, миллий театрчилигимизда ўқитувчи образи бош қаҳрамон қилиб олинган илк саҳна асари шу бўлса керак. Боз устига гап мактаб ўқитувчиси ҳақида кетмоқда. Ҳар ҳолда мен эслай олмадим ўқитувчи образи асосий планга олиб чиқилган спектаклни. Премьерада марҳум Тўхтамурод Жумаевнинг турмуш ўртоғи, ўғли, яқинлари ва кўплаб шогирдлари қатнашмоқда. Бу инсон ота-онамнинг синф раҳбари бўлган, мени ҳам ўқитган, ўша машҳур Қоракўл лицейидаги тўрт йиллик ўқиш давомида сон-саноқсиз суҳбатга киришганмиз. Муштдек ҳолимга Жумаев билан тортишган, баҳслашган ҳолларим ҳам бўлган. Ҳозир ўйласам, этим жимирлайди, "Жумаев билан-а?!" Сабаби оддий. Бу инсон ҳаммани эшитарди. Мен учун адолат, фидойилик, нотиқлик, қаттиққўллик каби қанчадан қанча фазилатларнинг ўрнаги эди Жумаев. Бу инсонга энг зўр таърифни шубҳасиз, Президентимиз айтдилар, Жумаевни "Замон Авлонийси!" дедилар ва бу Жумаев шахсияти учун энг олий мукофот аслида. Ўз вақтида Жумаев имтиҳондан йиқилган неварасини ўзи раҳбарлик қилаётган мактаб-интернатга қабул қилмаган. Мана, адолат! Мана, ҳақгўйлик! Спектаклдан ушбу воқеа ҳам жой олибди" -деди Ҳусан Тангриев.

Эслатиб ўтамиз, спектакль 2-3 ноябрь кунлари ҳам Муқимий театрда намойиш этилади.