Швецария, ўртача йиллик даромад: $85,000 - $110,000
Банк-молия, фармацевтика, технология каби соҳаларга талаб юқори. Швецария юқори малакали ишчилар учун қулай шароит яратади. Солиқлар нисбатан паст, яшаш сифати юқори. Айни пайтда, яшаш харажатлари ҳам юқори, аммо ўртача маош уларни қоплай олади. Ўтган йили ҳам швейцарияликлар ойига ўртача 8111 доллар маош олган. Гап солиқ ва бошқа чегирмалардан ташқари иш ҳақи ҳақида кетмоқда.

Люксембург, ўртача йиллик даромад: $75,000 - $100,000
Люксембург Европанинг молиявий марказларидан бири бўлиб, банк-молия соҳасида катта имкониятлар яратади. Мамлакат кичик бўлса-да, унинг йиллик даромади юқори. Лекин юқори маош яшаш харажатлари билан мувозанатда.

Сингапур, ўртача йиллик даромад: $70,000 - $95,000
Сингапур Осиёдаги энг қиммат мамлакатлардан бири бўлиб, юқори малакали ишчиларни жалб қилишда юқори маош таклиф этади. Бу ерда технология ва молия соҳалари ривожланган, солиқлар нисбатан паст.

АҚШ, ўртача йиллик даромад: $65,000 - $90,000
АҚШда юқори маошлар технология ва соғлиқни сақлаш соҳаларида тўланади. Бироқ, бу ерда маошлар штатлар ва шаҳарлар бўйича фарқланади. Масалан, Сан-Франциско ёки Нью-Йоркда яшаш харажатлари юқори, аммо маошлар ҳам шунга мос тарзда тўланади.

Бирлашган Араб Амирликлари, ўртача йиллик даромад: $60,000 - $85,000
Амирликларда молия, қурилиш, нефть ва газ соҳаларида катта маош тўланади. БААда солиқлар йўқ, бу эса мамлакатни юқори маош ва даромадга эга қилувчи давлатлар қаторига киришига сабаб бўлган. Дубай ва Абу-Дабида чет эллик ишчиларга жуда кўп имкониятлар мавжуд.

Норвегия, ўртача йиллик даромад: $55,000 - $80,000
Норвегияда иқтисод яхши ривожланган, нефть ва газ, технология каби соҳалардаги инсонлар энг кўп маош олади.

Австралия, ўртача йиллик даромад: $55,000 - $75,000
Австралияда энг кўп даромад технология ва соғлиқни сақлаш соҳаларида кузатилади. Ишчилар учун шароитлар яхши ва яшаш сифати юқори. Айниқса Сидней ва Мелбурн каби шаҳарларнинг яшаш тарси ҳавас қиларли даражада.

Канада, ўртача йиллик даромад: $50,000 - $70,000
Канадада қурилиш ва тиббиёт соҳаларида маошлар юқори. Бу мамлакат чет эллик ишчилар учун қулай яшаш шароитларини ҳам таклиф этади. Ўзбекистондан ҳам кўпгина юртдошларимиз бугун қонуний тарзда ушбу давлатга йўл олмоқда.

Германия, ўртача йиллик даромад: $50,000 - $65,000
Германия муҳандислик, автомобиль саноати, технология ва тиббиёт ўта ривожланган. Ишчилар учун қулай шароитлар ва хавфсизлик даражаси алоҳида эътиборга олинган. Юртимиздан минглаб юртошларимиз тиббиёт, қишлоқ хўжалиги ва қурилиш ишларида ушбу давлатга жалб қилинмоқда.

Дания, ўртача йиллик даромад: $50,000 - $65,000
Дания соғлиқни сақлаш ва технология соҳаларида юқори даромадли иш ўринлари билан машҳур. Бу мамлакатда ишчилар учун кучли ижтимоий таъминот тизими мавжуд ва яшаш шароитлари юқори даражада.

Юқоридаги мамлакатлар юқори маош ва яшаш шароитлари билан ажралиб туради, аммо яшаш харажатлари ҳам ўртача даромадлар билан мос равишда ўсиб боради. Бу давлатларда технология, молия, тиббиёт ва муҳандислик соҳаларида малакали ишчиларга энг юқори даромадлар таклиф қилинади.

Феруза Раҳимова,
ishonch.uz