Ижтимоий тармоқларда “Дўстлик” каналида чўкаётган аёлни бошқа бир аёл қутқариб қолди” деган хабарлар тарқалди. Халоскор – Гулистон шаҳрида яшовчи 28 ёшли Наргиза Маматова эди. У аввал ҳам бир кишини шундай қутқарган.

– Дам олиш куни эди, – дейди у. – Ҳар кунгидек, канал бўйида сайр қилиб юргандим. Ўша ёшгина аёлнинг ёнидан ўтиб кетдим. Кўзлари қизарган, руҳи синиқ эди. Тўхтаб, ҳол сўрамоқчи ҳам бўлдим. Тағин “холи қолишни истагандир” деб ўйлаб, яна йўлимда давом этдим. Ортимга қайтганимда у юпун кийимда темир тўсиқдан ўтдию, ўзини сувга ташлади. Дарҳол қутқаришга шошилдим. Қирғоққа чиқишимиз жуда қийин бўлди. Бир зумда миллий гвардия ходимлари, “Тез ёрдам” етиб келиб зарур ёрдамларни кўрсатишди. Аввало ундай бўлмасин, лекин агар яна шундай вазиятга дуч келсам, ҳеч қачон кимнингдир ўлишига жим қараб турмайман.

Наргиза Маматова 17 ёшида ҳам синфдош дугонасини оқим тортиб кетиб, чўка бошлаганида қутқариб қолганди.

Изоҳ: Наргизадек жасоратли қизларимиз билан фахрланамиз. У бир аёлнинг ҳаётини қутқарди. Икки гўдакка онасини, бир оилага ёлғиз қизларини қайтарди. Лекин на маҳалладан, на оила ва хотин қизлар бошқармаси ва на ҳокимлик томонидан бир оғиз рағбат билдирилмади. Афсус...

Баҳор Холбекова,
Ishonch.uz