Санэпидқўмита бу хабарларга изоҳ бериб, ҳақиқатан ҳам "Метапневмовирус" деган вирус борлигини тасдиқлади.

Аслида, бу вирус 2001 йилдан бери мавжуд экан. У ҳаво-томчи йўли билан юқади ва одатда куз-қиш мавсумида фаол бўлади.

Касаллик бурун оқиши, йўтал ва иситма билан намоён бўлади. Баъзи ҳолатларда бронхиолит ва пневмонияга ҳам олиб келиши мумкин.

Аммо, Санэпидқўмитанинг айтишича, хавотирланишга асос йўқ. Чунки, метапневмовирус билан касалланганларнинг аксарияти асоратларсиз тузалиб кетади.

Шуни ҳам қўшимча қилиш керакки, метапневмовирус дунёнинг барча мамлакатларида, жумладан, Қозоғистонда ҳам кузатилмоқда.

Ўзбекистонда ҳам ўткир респиратор инфекцияларнинг мавсумий кўтарилиши кузатилмоқда. Лаборатор таҳлиллари натижасига кўра, 36,9%да грипп вируси, 30,2%да риновирус, 28,6%да респиратор-синцитиал вирус, 1,2%да метапневмовирус ва 3,1%да бошқа вируслар аниқланган.

Санэпидқўмита фуқароларга метапневмовирус инфекциясидан сақланиш учун қуйидагиларни тавсия қилади:

* Профилактика ва гигиена қоидаларига риоя қилиш.
* Одамлар гавжум жойларга, айниқса, ёш болаларни олиб юришни чеклаш.
* Касаллик белгилари пайдо бўлган оила аъзоларини алоҳида сақлаб, шифокор кўрсатмасига асосан даволаниш.

Хуллас, метапневмовирус деган касалликдан қўрқиб кетманг. Одатдагидек, ўзингизни эҳтиёт қилинг ва гигиена қоидаларига риоя қилинг.