12 ноябрдан Ўзбекистонда банк карталари бўйича учта муҳим янгилик кучга кирди, деб ёзмоқда журналист Беҳзод Бозоров.

Бу ўзгаришлар нафақат техник тартиб, балки молиявий маданият, жамиятдаги рақамли фаоллик ва тўлов инфратузилмасининг ривожи учун ҳам аҳамиятли ҳисобланади.

Бизнес ва ижтимоий карталар: сегментациянинг бошланиши

Янги ўзгаришларга кўра, банк карталари биринчи марта мақсадга кўра турларга ажратилмоқда:

Бизнес карта якка тартибдаги тадбиркорлар ёки ўзини ўзи банд қилган фуқароларга мўлжалланган бўлиб, кичик тадбиркорлар айланмасини тўғри юритиш, шахсий ва бизнес маблағларини аралаштирмаслик имконини беради.

Ижтимоий карта нафақа, ижтимоий тўловлар, давлат ёрдамлари учун. Бу давлат тўловлари учун “алоҳида ҳисоб” концепциясини жорий қилади ва маблағлар сарфининг шаффофлигини оширади.

Олдиндан эмиссия ва рақамли идентификация

Картада фамилия-исм мажбурий бўлмайди. Карта олдиндан чиқарилади, кейин эса фойдаланувчи идентификациядан ўтгач фаоллаштирилади. Натижада банк филиалига боришга эҳтиёж қолмайди, карталар тезкор тарқатилади, онлайн хизматларга ўтиш тезлашади, банк карталари бозорида рақобат ошади.

Асосий янгилик: 14–18 ёшлиларга карта очишга рухсат берилмоқда

Бу ўзгаришнинг аҳамияти катта. Чунки ўспиринлик инсонда молиявий одатлар шаклланадиган давр ҳисобланади. Картадан фойдаланиш ёшларга тўлов қилиш, бюджет тузиш, онлайн хизматлардан фойдаланиш ҳамда молиявий интизомни барвақт ўрганиш имконини беради.

Бундай тизим қатор давлатлар, хусусан, Жанубий Корея, Сингапур, Туркияда кенг қўлланади.