Жаҳон бозорларида олтин ва кумуш нархлари мисли кўрилмаган даражага кўтарилди. 2026 йил 19 январь куни савдолар очилиши билан қимматбаҳо металлар ўзининг тарихий рекорд кўрсаткичларини янгилади. Хусусан, олтиннинг бир трой унцияси нархи 4 690 АҚШ долларидан ошди,кумуш эса 94 доллардан юқори баҳоланди.

Мутахассислар бу ҳолатни глобал иқтисодий ва сиёсий беқарорлик фонида инвесторларнинг хавфсиз активларга бўлган қизиқиши ошгани билан изоҳламоқда.

Геосиёсий кескинликлар, савдо урушлари хавфи ва иқтисодий ноаниқлик инвесторларни эҳтиёткорликка ундамоқда.Deutsche Welle таъкидлашича, қимматбаҳо металлар нархининг кескин ошишига бир қатор омиллар таъсир кўрсатган. АҚШ президенти Доналд Трамп томонидан айрим Европа давлатларига нисбатан 10 фоизлик бож тарифлари жорий этилиши мумкинлиги ҳақидаги баёнотлар жаҳон бозорларида жиддий хавотир уйғотди. Бу хабар ортидан акциялар бозорида пасайиш кузатилди. АҚШ долларининг халқаро бозорда қадрсизланиши ҳам олтин ва кумушга бўлган талабни оширди. Чунки доллар арзонлашганда қимматбаҳо металлар инвесторлар учун янада жозибадор бўлади.

Мутахассислар фикрига кўра, агар глобал сиёсий ва иқтисодий беқарорлик сақланиб қолса, олтин ва кумуш нархлари янада ўсиши мумкин. Айни пайтда қимматбаҳо металлар жаҳон молиявий бозорида энг ишончли активлардан бири сифатида қаралмоқда.