Тадбирда Ҳиндистоннинг Ўзбекистондаги элчиси Смита Пант ҳамда оммавий ахборот воситалари вакиллари иштирок этди. Элчи хоним сўнгги йилларда икки давлат ўртасидаги ривожланиб бораётган ишончли муносабатларда эришилган асосий ютуқлар ва муҳим ўзгаришлар ҳақида маълумот берди. Жумладан, давлат раҳбарларининг 2025 йилдаги халқаро даражадаги учрашувлари, парламентлараро алоқалар, маданий-маърифий ҳамкорлик таҳлил қилинди. 12-15 март кунлари Тошкентда ҳинд киноижодкорлари томонидан ўтказилиши режалаштирилаётган 2 - кинофестивал учун 5 та ҳинд киноси танлангани маълум қилинди.

Тадбирда таъкидланишича, 2025 йилда ўқиш учун 16 минг ҳинд ёшлари мамлакатимизга келган. Сайёҳлар сони эса қарийб 100 минг нафарни ташкил этган.
– Ҳиндистонда ўзбек тилини ўрганиш ривожланмоқда, – деди Ҳиндистоннинг Ўзбекистондаги элчиси Смита Пант. – Жумладан, яқинда Панжоб шаҳрида ўзбек тилини ўргатувчи ўқув маркази очиляпти. Деҳли университетида эса бакалавр йўналишида ўзбек тили факультети ташкил этилди. Булар аллақачон бўлиши керак эди, чунки сўнгги йилларда ҳиндистонлик ёшлар ўзбек тилини қизиқиб ўрганмоқда.
Дарвоқе, ушбу мамлакатдан келган ёшлар юртимизда асосан тиббиёт йўналишида таҳсил олишмоқда.

Бундан ташқари тадбирда Ҳиндистон Ўзбекистоннинг энг йирик савдо ҳамкорлари ўнталигига кириши, фармацевтика, машинасозлик, қишлоқ хўжалиги, кончилик ва транспорт-логистика лойиҳалари каби йўналишларда ҳали фойдаланилмаган салоҳият ва имкониятлар катта экани таъкидланди.

Зебо Намозова,
ishonch.uz