Ferruchcho Lamborjini Italiyadagi olis qishloqda tug'ilgan, shuning uchun u fermerlarning yumushlaridan ko'proq xabardor edi, ota-onasi ham dehqonchilik bilan shug'ullanardi. Lekin bola texnologiyaga ko'proq qiziqardi, shuning uchun unga ijod qilish uchun kichik xona berildi. U qishloq xo'jaligi texnikasi uchun zarur bo'lgan qismlarni yasab, hatto o'z texnikasini loyihalashtirdi. Ishiga shu darajada berilib ketdiki, bir kuni u detal' quyib olayotganda ustaxonada portlash sodir bo'ldi, natijada yong'in Lamborjini fermasini deyarli vayron qildi.

voyaga yetgan Ferruchcho universitetni texnologiya mutaxassisligi bo'yicha tugatdi va Ikkinchi jahon urushi paytida mexanik bo'lib xizmat qildi. Shunday qilib, uning butun hayoti texnologiya bilan bog'liq edi, bo'lajak biznesmen buni yaxshi tushunardi. Fashistlar Italiyasi armiyasida xizmat qilgan vaqtida asirga tushdi. Urushdan keyin, 1947 yilda Britaniya asirligidan uyga qaytgach, u texnologiya sohasida yana ish boshladi.

Urushdan keyin mamlakatda juda ko'p harbiy texnika qolgan, lekin qishloq xo'jaligi texnikasi deyarli yo'q edi, chunki hamma narsa harbiy ehtiyojlarga bag'ishlangan juda uzoq davr hukm surgandi. Urushdan ko'plab tanklar va boshqa transport vositalari qoldi, ularning ba'zilari haydashga yaroqli edi, ammo ulardan tinch hayotda foydalanib bo'lmasdi. vaziyatdan xulosa chiqargan Lamborjini qishloq xo'jaligi texnikasiga zo'r berdi va keyin o'zining birinchi traktorini ishlab chiqdi. Shunday qilib, uning traktor kompaniyasi paydo bo'ldi va bozorga minglab qishloq xo'jaligi mashinalarini yetkazib berdi. Ferruchcho nafaqat texnologiyani tushunardi, balki sport mashinalarini ham yaxshi ko'rardi. U bir nechta Ferrari kabi turli xil avtomobillarni sotib oldi. Ammo texnik n'yuanslarni tushunishiga qaramay, ularning barchasidan uncha ko'ngli to'lmasdi. Unga so'nggi Ferrari 250GT avtomobilining muftasi yoqmadi va uni yaxshilash yo'llarini ham izlab ko'rdi.

Lamborjini shaxsan Entso Ferrari bilan mashinaning kamchiliklarini muhokama qilish va ularni qanday tuzatish bo'yicha maslahat berish uchun uchrashdi. Ammo Entso uning maslahatlarini sovuq kutib oldi va mashinalar haqida hech narsa bilmasligini va traktor ishlab chiqaruvchisi o'z ishi bilan shug'ullanishi kerakligini aytdi. Bu Ferruchchoni qattiq xafa qildi va u o'zining “Ferrari”dan yaxshiroq bo'lgan mashinasini yaratishga qaror qildi. U orzusidagi “Ferrari”sini uyida qayta qurdi. Kamchilik kuzatilgan qismlarni almashtirdi, bu uning mashinalar traktorlardan unchalik farq qilmasligiga bo'lgan ishonchini tasdiqladi.

Lamborjini 1963 yilda Sant-Agata Bolon'eze shahrida, Ferrari yig'iladigan zavod yaqinida avtomobil' zavodiga asos solgan. U ilgari Entso qo'lida ishlagan va o'n ikki tsilindrli dvigatelni ishlab chiqqan ikki muhandisni yolladi. Shunday qilib, g'ayrioddiy dizayni va tezligi bilan mashhur bo'lgan sport avtomobillarini yaratish boshlandi, ammo ular poygalarda qatnashmadi. Lamborjini o'z mashinalari poygalarda qatnashmasligini e'lon qildi va va'dasida turdi.

Lamborjini traktorlaridagi emblema uchburchak shaklida bo'lib, uning bosh harflarini o'z ichiga olgan, ammo mashina uchun boshqa emblema ishlab chiqilgan. U ishonchlilik, kuch va g'ayratni ifodalash uchun mo'ljallangan edi. Dizayn himoya ramzi bo'lgan qalqon va mashinaning yengilmas kuchini ifodalovchi g'azablangan, muskulli buqa tasviriga asoslangan edi. Kompaniya bir necha bor qayta sotilgandan keyin ham emblema o'zgarishsiz qoldi. Faqat rangi va tuzilishi o'zgardi, ammo mohiyati o'zgarishsiz qoldi. Sport modellari tezda shuhrat qozondi. 1963 yil oktyabr oyida Lamborjini 350 GTv prototipi taqdim etildi, keyingi mart oyida sotuvga chiqarildi va muvaffaqiyatli bo'ldi. Keyin boshqa modellar ham paydo bo'ldi, bu kompaniyaga katta foyda keltirdi va yangilarini ishlab chiqishga imkon berdi.

Ma'lumot uchun: Tarixdagi eng qimmat Lamborjini modeli Lamborghini veneno Roadster (2014) hisoblanadi va uning narxi kim oshdi savdolarda 8,3 million yevrodan oshgan.

Miura Ferruchcho Lamborjinining eng muvaffaqiyatli va sevimli modeliga aylandi. Ammo har doimgidek, muvaffaqiyatdan keyin noxushlik ham yuz berdi. Lamborjinining asosiy biznesi traktor ishlab chiqarish edi. 1972 yilda yirik shartnoma imzolandi va bu juda katta pulga tushdi. Uskunalar Janubiy Amerikaga jo'natilishi kerak edi, ammo shartnoma bekor qilindi.

Bu jiddiy inqirozga olib keldi va Ferruchcho traktor biznesidagi ulushlarining deyarli yarmini sotishga majbur bo'ldi. Avtomobil ishlab chiqarish yaxshi ketayotgan edi, savdo o'sib borardi, lekin 1973 yilda Lamborjini o'zi asos solgan avtomobil' kompaniyasini sotdi. U deyarli hayotini o'zgartirib, 740 akr yer va La Fiorita nomli mulk sotib oldi. Dastlab u bu mulkdan dam olish maskani sifatida foydalangan, ammo keyinchalik uzum ekib, vinochilikni boshladi. Ferruchcho avtomobil kompaniyasini sotgandan keyin ham bekor turmadi. U gol'f aravachalari ishlab chiqarishni boshladi va hatto Papa Ioann Pol II uchun ham bittasini yasadi.

Mamlakatning iqtisodiy ahvoli va avtomobil ishlab chiqarishga turli ta'sirlar Lamborjini kompaniyasini bir necha bor sotishga majbur qildi. Nihoyat AudiAG 1999 yildan beri avtosanoatda qolgan oxirgi Lamborjini ishlab chiqaruvchisi bo'lib qolmoqda.

Yangi modellar doimiy ravishda takomillashtirilib borildi, jumladan, vertikal ochiladigan eshiklar, yangi kuzov materiallari va takomillashtirilgan dvigatellar, tashqi ko'rinishini aytmasa ham bo'ladi. Dizayn har doim eng yaxshi va eng taniqli mutaxassislar tomonidan ishlab chiqilgan, shuning uchun ularning tashqi ko'rinishi durdonalarga o'xshaydi.

Masalan, Countach burchak shakllariga ega ekzotik dizaynga ega yangi model' edi. Keyinchalik uning o'rnini takomillashtirilgan Diablo, keyin esa Mursielago egalladi. Lamborjinining birinchi yo'ltanlamas avtomobili LM002 1986 yilda yaratildi. Nisbatan mitti avtomobil', “kichik” laqabli Gallardo politsiya xodimlari orasida mashhur bo'ldi. Yangi va qimmat Sesto Elemento Gallardo asosida ishlab chiqilgan, ammo dizayn yondashuvi o'zgacha edi. U 2010 yilda yaratilgan. Kompaniyaning 50 yilligini nishonlash uchun esa takomillashtirilgan texnik xususiyatlarga ega veneno superkari ishlab chiqildi.

Bu juda tezkor, yuqori sifatli, chiroyli va afsonaviy avtomobillar butun dunyo bo'ylab sotiladi, ammo narxi qimmat bo'lgani uchun hamma ham ularni sotib olishga qodir emas. Masalan, ushbu avtomobillarni Rossiyada 20 million rubl' va undan yuqori narxga sotib olish mumkin edi. Dastlab, avtomobil' Rossiyada atigi bir nechta dona sotilgan, bu esa rasmiy dilerni savdodan voz kechishga majbur qilgan.

Abror Zohidov