Шундан 42 таси бевосита болалар томонидан юборилган бўлиб, бу умумий мурожаатларнинг 2,17 фоизини ташкил этган. Шунингдек, 2025 йил давомида вакилнинг 35 та шахсий қабули ўтказилиб, уларда 141 нафар фуқаронинг мурожаати кўриб чиқилган.

Мурожаатлар таҳлили ва мониторинг фаолияти натижасида бола ҳуқуқлари ва қонуний манфаатлари бузилиши ҳолатлари юзасидан жами 36 та таъсир ҳужжати киритилган. Жумладан, 2 та огоҳлантириш, 6 та тақдимнома, 25 та хулоса ҳамда 3 та суд ҳужжати устидан протест келтириш тўғрисида илтимоснома расмийлаштирилган.

Мурожаатларни ўрганиш асосида болаларга нисбатан содир этилган зўравонлик ҳолатлари бўйича 19 та жиноят иши ва 26 та маъмурий иш қўзғатилган. Шунингдек, жиноят ишини қўзғатишни рад этиш ҳақидаги 20 та қарор бекор қилиниб, қўшимча текширув ўтказиш учун юборилган.

Интернет тармоғида ўтказилган мониторинг натижасида аниқланган бола ҳуқуқлари бузилиши ҳолатлари бўйича эса 23 та жиноят иши ва 28 та маъмурий иш қўзғатилиши таъминланган.

Таълим муассасаларида болага нисбатан жисмоний зўравонлик қўллагани ҳамда касбий вазифасига совуққонлик билан ёндашгани учун 6 нафар педагог маъмурий жавобгарликка тортилган. Болаларга нисбатан қўпол хатти-ҳаракатлари учун 15 нафар педагогга интизомий жазо қўлланилган.

Шу билан бирга, боланинг шаъни ва қадр-қимматини поймол қилгани учун 2 нафар фуқаро маъмурий жавобгарликка тортилган, қонунбузилишларга йўл қўйган ҳуқуқни муҳофаза қилувчи органларнинг 2 нафар ходимига нисбатан интизомий жазо чоралари кўрилган.