Ҳормузни очиш — бу “бир-икки кунлик амалиёт” эмас, балки узоқ давом этадиган, қимматга тушадиган ва натижаси ноаниқ бўлган ўта хавфли кампаниядир.

1. Бу бўғоз эмас — бу қопқон

Ҳормуз — қирғоқдан ўққа тутиладиган тор йўлак. Уни ҳимояси учун Эронга “флот сақлаш”нинг ҳожати йўқ — миналар, дронлар, ракеталар ва катерларнинг ўзи кифоя. Ҳозирнинг ўзидаёқ кемаларга қилинаётган ҳужумлар қатновни деярли нолга туширди. Яъни, қисман таҳдиднинг ўзиёқ блокада вазифасини ўтамоқда.

2. Амалиёт кўп босқичли ва чўзилувчан бўлади

Тахминларга кўра, АҚШ амалиёти камида уч босқичдан иборат бўлади:
- Ҳаво ҳужумидан мудофаа тизимлари ва ракета позицияларини бостириш;
- Денгизни миналар ва дронлардан тозалаш;
- Кемаларни доимий равишда кузатиб бориш.

Ҳар бир босқич ҳафталаб давом этади. Бу вақт давомида эса кемалар, авиация ва шахсий таркиб доимий зарбалар остида қолади.

3. Йўқотишлар муқаррар

АҚШ тўлиқ устунликка эга бўлса-да, Эрон асимметрик ўйин олиб бормоқда: қимматбаҳо кемаларга қарши арзон дронлар, миналар ва қирғоқ ракеталари. Биргина хато — ва миллиардлаб долларлик эсминецдан айрилиш мумкин. Бундан ташқари, айрим сценарийлар (масалан, асосий нуқталарни эгаллаб олиш) “ўз жонига қасд қилиш миссиялари”га яқин деб баҳоланмоқда.

4. Иқтисодиёт амалиётдан тезроқ қулайди

Ҳормуз бўғози орқали жаҳон нефтининг қарийб 20 фоизи ўтади. Қатновнинг қисман издан чиқиши ҳам 70 йиллардан буён кузатилмаган энг йирик энергетик зарбага сабаб бўлади. Яъни ҳарбийлар “бўғозни очгунича” жаҳон иқтисодиёти аллақачон зарба қабул қилиб бўлади.

5. Муваффақият қозонилган тақдирда ҳам натижа ноаниқ

Агар АҚШ бўғозни жисмонан “очса” ҳам, уни доимий назоратда ушлаб туришига тўғри келади. Эрон арзон воситалар ёрдамида кема қатновини қайта-қайта издан чиқариши мумкин. Бу ғалаба эмас, бу — олов остидаги тор йўлакни чексиз қўриқлаш дегани.

Бошқача айтганда: бу “бўғозни очиш” амалиёти эмас, бу — “унда абадий қолиб кетиш” амалиётидир.