2024 йилда АҚШ мудофаа соҳасига қарийб 1 триллион доллар сарфлади. Бу мамлакатнинг ялпи ички маҳсулотининг (ЯИМ) 3,4 фоизини ташкил этади.
Таққослаш учун айтадиган бўлсак, Европа давлатлари ва Канададан иборат НАТОга аъзо мамлакатлар мудофаа харажатларига ўртача ЯИМнинг 2 фоизини йўналтирган. Россиянинг мудофаа сарфлари 2000 йилдан бери 227 фоизга, Хитойники эса 566 фоизга ошган.

Халқаро стратегик тадқиқотлар институти маълумотларига кўра, 2025 йилдаги энг йирик мудофаа бюджетлари қуйидагича:

1. АҚШ — 968 миллиард доллар
2. Хитой — 235 миллиард доллар
3. Россия — 145,9 миллиард доллар
4. Германия — 86 миллиард доллар
5. Буюк Британия — 81,1 миллиард доллар
6. Ҳиндистон — 74,4 миллиард доллар
7. Саудия Арабистони — 71,7 миллиард доллар
8. Франция — 64 миллиард доллар
9. Япония — 53 миллиард доллар
10. Жанубий Корея — 43,9 миллиард доллар

АҚШнинг ҳарбий харажатлари ҳажми яна 12 та давлатнинг умумий мудофаа бюджетларига тенг.
Хитой 235 миллиард долларлик бюджет билан иккинчи ўринни эгаллайди. Харид қобилияти ҳисобга олинганда, бу кўрсаткич 477 миллиард долларга тенг. Мамлакатда армияни фаол модернизация қилиш ишлари олиб борилмоқда ва ҳозирда Хитой ихтиёрида 600 та ядровий зарба воситаси мавжуд.

Россия 146 миллиард долларлик мудофаа бюджети билан учинчи ўринда турибди. Бу мамлакат ЯИМининг 6 фоизини ташкил этади. Реал харид қобилиятига ўтказилганда, ушбу бюджет ҳажми 461 миллиард долларга етади. Россиянинг ядровий кўрсатгичи АҚШники билан деярли тенг, деб ёзади Visual Capitalist.

Ўзбекистон Марказий Осиёда етакчи

Global Firepower нашрининг маълумотига кўра, Ўзбекистоннинг 2025 йилги мудофаа харажатлари тахминан $2.8 миллиард деб баҳоланган.

Бу кўрсаткич билан Ўзбекистон Марказий Осиёда биринчи, дунёда эса 58-ўринда бормоқда.