Ўзбекистон дунёда сайёҳлар оқими энг тез ўсaётган ТОП–7 мамлакатлар қаторига кирди

Бутунжаҳон туризм ташкилоти томонидан эълон қилинган сўнгги таҳлилий маълумотларга (World Tourism Barometer) кўра, Ўзбекистон 2025 йилнинг январь–сентябрь ойларида хорижий сайёҳларни жалб қилиш бўйича дунё миқёсида энг юқори ўсиш қайд этилган ТОП–7 давлатлар қаторига кирди.

37 21:55 | 17.12.2025 21:55

Хусусан, мамлакатга ташриф буюрган халқаро туристлар оқими 2019 йил даражасига нисбатан 73 фоизга ошиб, Ўзбекистоннинг глобал туризм маконидаги мавқеи изчил мустаҳкамланиб бораётганини кўрсатди.

БМТ Туризм рейтингига мувофиқ, 2019 йилга нисбатан туристлар сонининг ўсиш суръатлари бўйича Ўзбекистон Европа минтақасининг энг яхши натижа қайд этган давлатлари қаторида 2-ўринни эгаллади. 2025 йилнинг дастлабки тўққиз ойида Ўзбекистонга келган халқаро туристлар сони 2024 йилга нисбатан 13 фоизга ошди ва натижада мамлакат Европа минтақасида энг юқори ўсиш қайд этган ТОП–4 туристик йўналишлар қаторига киритилди.

Глобал тенденциялар фонида Ўзбекистон сайёҳлик фаоллигининг янада таъсирчан ўсишини кўрсатмоқда. 2025 йилда мамлакат ўз рекордларини янгилади: дастлабки 11 ойда 10,7 миллиондан ортиқ хорижий сайёҳ ташриф буюрди, апрель ойидан бошлаб эса тарихда биринчи марта ҳар ойда миллиондан ортиқ сайёҳ келмоқда. Туристик хизматлар экспортидан олинган даромадлар 4,4 миллиард доллардан ошди.