Тадбирда Ўзбекистон касаба уюшмалари Федерациясининг Тошкент шаҳар Кенгаши, Меҳнат ва ижтимоий муносабатлар академияси, Федерация тасарруфидаги “Яккасарой спорт соғломлаштириш мажмуаси” Масъулияти чекланган жамияти, Халқаро Шахмат Академияси мутасаддилари, шахмат соҳаси усталари, жамоатчилик вакиллари ва талаба-ёшлар иштирок этдилар.

Мазкур “Шахмат мактаби” ҳам аҳоли, айниқса, ўқувчи ёшлар ўртасида шахмат ўйинини кенг тарғиб этиш билан бирга, йигит-қизлар орасидан шахмат ўйинига қизиқувчи ёш иқтидорларни аниқлаб, қобилиятларини юзага чиқариш, уларнинг билим ва кўникмаларини ошириш, бу орқали улар орасидан кучли шаҳматчилар етишиб чиқишини таъминлашга хизмат қилади.

Тадбир давомида эндиликда мамлакатимиз ҳудудларидаги меҳнат жамоаларида “Шахмат клублари” ташкил этилиши, корхона, ташкилот ва муассасалар ходимлари ўртасида ҳар йили шахмат бўйича туман-ҳудуд-республика босқичларидан иборат мусобақаларни ўтказиш кўлами янада кенгайтирилиши таъкидланди.

Қувонарлиси, мамлакатимиз касаба уюшмалари ҳаракатининг 120 йиллиги олдидан амалга оширилган ушбу хайрли лойиҳа натижасида шахмат ишқибозлари ушбу мактабда ақл гимнастикаси сирларини бепул ўрганиш имкониятига эга бўладилар.

Муҳаббат ЎРМОНБЕКОВА,
Ўзбекистон касаба уюшмалари Федерацияси Матбуот хизмати раҳбари