Joriy yil boshida Pastdarg'om TTB ma'muriyati 14-sonli Oilaviy poliklinikada ayollar shifokori vazifasi bo'sh (vakant) bo'lganligi bois doyalar – Luiza Shermamatova, Gulshoda To'qsonova, Kumushoy Shermamatovalarga o'z hohishlari bilan o'rindoshlik asosida ishlashga o'tishi kerak, degan taklif berildi. Ko'p o'tmasdan hamshiralarga mazkur oilaviy poliklinikada ishlash uchun ayollar shifokorini topib kelishsa, har uchala xodim ham o'z o'rinlarini saqlab qolishi mumkinligi aytiladi.

O'n besh yillik qadrdon go'shasidan ayrilishni istamagan hamshiralar yeldi-yugurdi. Oxiri bir shifokorni oilaviy poliklinikada ishlashga ko'ndirishdi. Biroq, bo'sh turgan ayollar shifokori vazifasi egallangan bo'lsada, hech bir sababsiz ularning o'rindoshlik asosida ishlash vazifasiga tushirilishi aniq bo'lib qoldi. Hashiralarning yuqori idoralarga qilgan murojaatlari bekor ketdi, oxiri kasaba uyushmalariga murojaat qilishdi.

Ariza yuzasidan O'zbekiston sog'liqni saqlash xodimlari kasaba uyushmasi Samarqand viloyat kengashi mehnat inspektsiyasi, Pastdarg'om tuman tibbiyot birlashmasi kasaba uyushma qo'mitasi muzokaralarga kirishdi. Ma'muriyat oldiga qonunchilik doirasida ish yuritish talabi qo'yildi. Har uchala hamshiralarning ham buzilishga daxldor bo'lgan huquqlari tiklandi.

Shu o'rinda aytib o'tish joiz, Samarqandda sog'liqni saqlash tizimini tashkil etishning “yangi modeli”ni joriy etish tajriba-sinovi amaliyotdan o'tkazilayapti.

− Afsuski tizimdagi islohotlar jarayonida bir qator tumanlarda shtat me'yorlarining o'zgarishi yuzasidan farmon va qonunga zid ravishda mehnat shartnomalarini bekor qilish holatlari uchrayapti, − deydi sog'liqni saqlash xodimlari kasaba uyushmasi Samarqand viloyat kengashi raisi G'olib Rustamov. − Birgina yanvar oyining o'tgan o'n besh kunida tizim xodimlaridan ayni yo'nalishda 9 ta murojaat qabul qildik. Ayni paytda 7 ta holatda xodimlarning buzilgan huquqlari tiklandi, yana 2 ta murojaat yuzasidan muzokaralar olib borilayapti.

Nurilla Shamsiev,

Ishonch.uz