Ichki ishlar boshqarmasi bayonotida ta'kidlanishicha, bir qator fuqarolarning murojaat va shikoyatlari asosida 1980 yilda tug'ilgan F. Ro'zmetov hamda 1992 yilda tug'ilgan A. Avezov va boshqa shaxslarga nisbatan O'zbekiston Respublikasi Jinoyat kodeksining quyidagi moddalari bilan jinoyat ishi qo'zg'atilgan: 139-moddasi 3-qismi «a», «g» bandlari (tuhmat), 165-moddasi 3-qismi «a», «v» bandlari (tovlamachilik), 168-moddasi 4-qismi «a», «v» bandlari (firibgarlik), 198-moddasi 3-qismi (ekinzorlarni, o'rmonlarni, daraxtlarni yoki boshqa o'simliklarni shikastlantirish yoki nobud qilish), 228-moddasi 2-qismi «v» bandi va 3-qismi (hujjatlar, shtamplar, muhrlar va blankalarni tayyorlash, qalbakilashtirish, sotish yoki ulardan foydalanish), 229-moddasi (o'zboshimchalik), shuningdek, 244 prim 6-moddasi 3-qismi (yolg'on axborot tarqatish).

Ma'lum qilinishicha, F. Ro'zmetov va A. Avezovga nisbatan ehtiyot chorasi sifatida qamoqqa olish chorasi qo'llanilgan.

Ichki ishlar boshqarmasi mazkur shaxslarning xatti-harakatlari natijasida zarar ko'rgan fuqarolardan tergov bo'limiga murojaat qilishni so'ramoqda.
Ma'lumot o'rnida aytish joizki, F. Ro'zmetov “Qonun doirasida” ommaviy axborot vositasi rahbari, A. Avezov esa ushbu OAv xodimi hisoblanadi.