Ma'lumotlarga ko'ra, zaharlanishdan bir kun oldin, ya'ni 8 oktyabr' kuni bolalar biokefir, sariyog' va sir mahsulotlarini iste'mol qilishgan. Epidemiologik tekshiruv natijasida aniqlanishicha, bog'chalarda oziq-ovqat mahsulotlarini tashish, saqlash va ishlov berishda sanitariya qoidalari buzilgan.

Jizzax viloyati sanitariya epidemiologik osoyishtalik va jamoat salomatligi boshqarmasi xulosasiga ko'ra, bu holat bolalarning oshqozon-ichak tizimida og'ir buzilishlarga sabab bo'lishi mumkin.

Hozirda Forish tuman prokuraturasi tomonidan O'zbekiston Respublikasi Jinoyat kodeksining 205-moddasi (xizmat vazifasini suiiste'mol qilish) bo'yicha jinoyat ishi qo'zg'atildi. Tergov harakatlari davom etmoqda.

Savollar esa ochiq qolmoqda:

Maktabgacha va maktab ta'limi vazirligi bu holat yuzasidan qanday choralar ko'ryapti?

Nega oziq-ovqat mahsulotlari sifat nazorati doimiy ravishda ta'minlanmayapti?

Toshkent viloyatidagi zaharlanish voqeasidan keyin nima uchun tizimdagi kamchiliklar bartaraf etilmadi?

Bola hayoti bilan bog'liq tashkilotlarda javobgarlik nega hali ham sust?

Maktabgacha va maktab ta'limi vazirligi, shuningdek SES rahbariyatidan ushbu vaziyat bo'yicha rasmiy bayonot berishini kutamiz.

Eslatib o'tamiz, yaqinda Toshkent viloyatida ham bolalarning ommaviy zaharlanish holati qayd etilgan edi. Ammo bu voqea mas'ullar uchun saboq bo'lmaganga o'xshaydi...