Olmaotada bir kishining o'rtacha oylik xarajati (ijarasiz) 750–800 AQSh dollari atrofida. Shu bilan birga, markazda joylashgan bir xonali kvartirani ijaraga olish narxi 500–600 dollarni tashkil etadi.

Taqqoslash uchun:
Toshkentda shu turdagi uy uchun o'rtacha ijara haqi 350–400 dollar,
Bishkekda 300 dollar,
Dushanbeda esa 250 dollar atrofida.

Mahsulot narxlarida ham farq seziladi. Masalan, 1 kg. mol go'shti Olmaotada o'rtacha 10–12 dollar, Toshkentda esa 8-9 dollar atrofida. Transport, kommunal xizmatlar va umumiy iste'mol savatchasi bo'yicha ham Qozog'iston shahri mintaqada yetakchilik qilmoqda.

Iqtisodchilar fikricha, Olmaotadagi narxlarning tez o'sishiga bir nechta omillar sabab bo'lgan:

1. Uy-joy bozoridagi bosim. So'nggi uch yil ichida shahar aholisi 2 milliondan oshdi. Talab ortgani sari yangi turar-joylar qurilishi ham tezlashdi, ammo ularning aksariyati yuqori daromadli qatlamga mo'ljallangan.
2. Xizmatlar sektori kengaygan. Bank, IT, ta'lim va tibbiyot sohalaridagi xususiy xizmatlar ko'paysa-da, ularning narxi ham oshib bormoqda.
3. Inflyatsiya va valyuta kursi. Qozog'iston milliy valyutasi — tenge 2024 yil davomida 10 foizga qadrsizlandi. Bu esa import tovarlari va ijara narxlariga to'g'ridan-to'g'ri ta'sir ko'rsatdi.

Bu esa, ayniqsa, o'rta sinf va byudjet sohasi vakillari uchun yangi sinovlarni keltirib chiqarmoqda.

Feruza Rahimova,
Ishonch.uz