Ko‘p qavatli uylardagi xonadonlar, hovli-joylar hamda noturar obʼektlar narxlarida o‘sish kuzatildi. Ayrim tumanlarda narxlar shaharning o‘rtacha ko‘rsatkichlaridan ancha yuqori shakllangan bo‘lsa, baʼzi hududlarda o‘sish surʼatlari sekinlashgan yoki pasayish holatlari qayd etilgan.

Ko‘p qavatli uylardagi xonadonlarning 1 kvadrat metri uchun o‘rtacha bozor narxi yil boshidan buyon 3 foizga oshdi. Hozirda poytaxt bo‘yicha kvartiralarning 1 kvadrat metri o‘rtacha 16,9 million so‘mni tashkil etmoqda. Tumanlar kesimida eng yuqori narxlar Shayxontohur tumanida qayd etilgan bo‘lib, bu erda 1 kvadrat metrning o‘rtacha qiymati 25 million so‘mgacha etgan.

Narxlar dinamikasiga nazar tashlansa, yanvar oyiga nisbatan eng yuqori o‘sish Olmazor va Yakkasaroy tumanlarida kuzatilgan. Mazkur hududlarda kvartiralar narxi 5,2 foizga oshgan. Shu bilan birga, Sergeli va Yangihayot tumanlarida ko‘p qavatli uylar bozorida sezilarli o‘zgarish qayd etilmagan.

Hovli-joylar segmentida ham o‘sish tendentsiyasi saqlanib qolmoqda. Toshkent shahri bo‘yicha hovlilarning 1 sotixi uchun o‘rtacha bozor narxi 2,3 foizga qimmatlab, 1 milliard so‘mga yaqinlashgan. Bu esa er uchastkalari va yakka tartibdagi uy-joylarga bo‘lgan talab yuqoriligicha qolayotganidan dalolat beradi.

Poytaxtdagi eng qimmat hovlilar anʼanaviy ravishda Mirzo Ulug‘bek tumanida joylashgan. Bu erda 1 sotix er maydonining o‘rtacha bozor qiymati 1,7 milliard so‘mni tashkil etmoqda.

Hovli-joylar narxining eng yuqori o‘sishi Mirobod tumanida kuzatilib, mazkur hududda ko‘rsatkich 6,6 foizga oshgan. Aksincha, Sergeli va Yangihayot tumanlarida hovlilar narxi 3,1 foizga pasaygan.

Noturar ko‘chmas mulk segmentida o‘sish surʼati nisbatan mo‘ʼtadil bo‘lib, yil boshidan buyon narxlar o‘rtacha 1,9 foizga ko‘tarilgan. Biroq bu bozorda ham markaziy va iqtisodiy faol hududlar etakchilikni saqlab qolmoqda.

Jumladan, noturar obʼektlarning 1 kvadrat metri uchun o‘rtacha bozor narxi Mirzo Ulug‘bek tumanida 24,4 million so‘mni, Mirobod tumanida 22,6 million so‘mni va Yakkasaroy tumanida 21,8 million so‘mni tashkil etgan. Bu ko‘rsatkichlar mazkur tumanlarda biznes va xizmat ko‘rsatish obʼektlariga talab yuqori ekanini ko‘rsatadi.

Umuman olganda, 2026 yilning dastlabki besh oyi yakunlari Toshkent shahri ko‘chmas mulk bozorida barqaror o‘sish saqlanayotganini ko‘rsatmoqda. Kvartiralar uchun 1 kvadrat metrning o‘rtacha narxi 16,9 million so‘mga, hovli-joylarning 1 sotixi qiymati esa 1 milliard so‘mga yaqinlashgani poytaxtda ko‘chmas mulkka bo‘lgan talab yuqoriligicha qolayotganini anglatadi. Shu bilan birga, Mirzo Ulug‘bek, Mirobod, Shayxontohur, Olmazor va Yakkasaroy tumanlari bozorning eng faol va qimmat hududlari sifatida shakllanmoqda.