vaziyatga oydinlik kiritish maqsadida “Toshshahartransxizmat”AJ bosh hisobchisi Zebo Shojalilova bilan suhbatlashdik.

— Avvalambor, oyliklarning kechikishiga korxonamizda so'nggi oylarda yuzaga kelgan moliyaviy qiyinchilik va haydovchilarning ish haqini hisob-kitob qilishdagi texnik uzilishlar sabab. Bizda haydovchilarning oylik maoshi soatbay va qilingan ishga qarab hisoblanadi. Ya'ni, oy yakunlangach, barcha reyslar qabul qilingandan so'ng hisob-kitob boshlanadi. Reyslarning qabul qilinishi esa ba'zan turli sabablar bilan cho'zilishi mumkin. Mas'ul xodimlar barcha reyslarni o'rganib, tasdiqlangandan so'ng reyslar asosida haydovchilarga oylikni hisoblaymiz.

Oldingi oyda qo'shimcha mablag' bo'lgani uchun avans berilgan edi. Ammo noyabr' oyida moliyaviy ahvolimiz biroz og'irlashgani sababli avans bera olmadik va oylik 26 noyabr' kuni to'liq berildi.

Maosh kechikishiga yana bir sabab shuki, bizda haydovchilar “Brutto” shartnomasi asosida ishlashadi. Bu tizimga ko'ra, maosh haydovchilar bosib o'tgan masofa, intervalga rioya qilishi, xizmat sifati va boshqa ko'rsatkichlar asosida shakllanadi. Bu jarayonlar tabiiy ravishda vaqt talab qiladi.

Bizda haydovchilar bir kun ishlab, bir kun dam oladi. O'rtacha 15 kunlik ish haqi 8-12 million so'mgacha. Uzoq yillik tajribaga ega haydovchilar bundan ham ko'proq maosh olishadi.

Kelgusida oylik masalasida cho'zilishlar kuzatilmaydi. Hisoblashdagi yangi tizimga moslashish sabab ayrim kechikishlar bo'ldi. Hozirda jarayonlar takomillashtirilmoqda.

Oylik kechikayotgani haqida haydovchilar ogohlantirilmagan. Maosh kechiksa-da, to'liq berildi.