Ishonch.uz мухбири бугунги кунда гиёҳвандликка қарам бўлиб бораётган болалар ва ўсмирлар орасидаги асл вазият билан қизиқди.

– Болалар ва ўсмирларнинг гиёҳвандликка, наркотик моддаларга “ўтириб” қолгани сир эмас. Очиғи, ҳақиқий рақамлар ҳақида гапиришга ҳам қўрқаман, сабаби статистика қўрқинчли. Масаланинг яна бир нозик жиҳати шуки, ўсмирлар ва ёшлар турли руҳий ҳолатлардан ўтади. Ота-она ва яқинларнинг нотўғри муносабати оқибатида улар ўзини ҳар куйга солиши мумкин. Наркоқарамликдан чиқариш, даволаш жудаям мураккаб жараён.

Вояга етмаганларнинг наркотик моддаларга қарам бўлиб қолгунча ота-онанинг сезмаслигини ҳечам оқлаб бўлмайди.

Агар фарзандингиз кўчадан боши оғриб, кўзи қизариб келса, хулқи ўзгарса, шубҳаланинг. Бу “сигнал”ларга эътибор бермаган ота-она бошқалардан ўпкаламасин.

Маҳалла, мактаб, тьютор ва психологлар ҳам болани назорат қилиши керак, лекин бу борада аксинча ҳолатни кўряпмиз. Масалан, бола дарсга кечикса, ўқитувчи хабар бергани учун ота-она “раҳмат, фарзандимни назорат қилганингиз учун” демаяпти. Аксинча, норозилик билдираётганлар ҳам бор.

Ўзбекистонда наркологик диспансерлар 2400 ўринга мўлжалланган. Аммо беморлар сони мавжуд ўриндан анча юқори. Бу рақамлар вазият қанчалик жиддийлигини кўрсатади. Шунинг учун наркологик ёрдам сифатини ошириш бу фақат шифокорларнинг эмас, балки жамиятнинг, жамоатчиликнинг ва ҳар бир оиланинг иши.

Бугун сall-марказлар ташкил этилган. Ҳеч кимдан “анализ топшир, диспансерга қўямиз” дейилмайди. Биз шуни хоҳлаймизки, ота-она бемалол фарзанди билан шифокорга бориши, ёрдамини олиши керак.

Афсуски, жорий йилнинг ўтган 9 ойи давомида наркологик рўйхатда 10 нафар вояга етмаган бемор қайд этилган. Уларнинг ўртача ёши - 17 ёш. Бундан ташқари, 15–16 ёшдаги уч нафар ўсмир наркотик заҳарланиш ташхиси билан рўйхатга олинган.

Беморлар орасида 10 ёшли ўсмирнинг ҳам борлиги жудаям ачинарли. Диспансер ҳисобида турган наркобеморларнинг 60 фоизи катталар, яъни 46−60 ёшлилар ҳисобланади. Аммо охирги йилларда гиёҳвандликка берилган шахслар орасида 25−30 ёшли беморлар сони кўпайиб боряпти.