Toshkent shahrida 120 ming AQSh dollarini internet tarmoqlaridagi qimor va tavakkalchilikka asoslangan o'yinga tikib, talon-toroj qilgan shaxslar fosh etildi. Bu haqida Iqtisodiy jinoyatlarga qarshi kurashish departamenti xabar berdi.

Unda aytilishicha, Bosh prokuratura huzuridagi Departamentning Yashnobod tumani bo'limi tomonidan tijorat bankining murojaatiga asosan tergovga qadar tekshiruv o'tkazilgan.

Aniqlanishicha, Yashnobod bank filialida bo'lim boshlig'i vazifasida ishlovchi fuqaro E.N. «A.» MShJ mas'ul shaxslari va boshqalar bilan o'zaro til biriktirib, «B.B.» MShJga 120 ming AQSh dollari kredit ajratilishiga erishgan.

Keyinchalik soxta hujjatlarni rasmiylashtirish orqali kredit mablag'ini naqdlashtirib olib, 120 ming AQSh dollarini internet tarmoqlaridagi qimor va tavakkalchilikka asoslangan o'yinlarga ishlatib, talon-toroj qilganliklari fosh qilingan.

Mazkur holat yuzasidan Jinoyat kodeksining 167-moddasi (o'zlashtirish yoki rastrata yo'li bilan talon-toroj qilish) va 228-moddasi (hujjatlar, burchak tamg'alar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo'zg'atilib, tergov harakatlari boshlab yuborilgan.