— Агар ходим тушгача ишлаб, тушдан кейин “больничний”очтирса, қандай ҳисоб-китоб қилинади? Ярим кунга иш ҳақи, ярим кунга “больничний” тўлаймизми?

Гуллола ҲАМДАМОВА, кадрлар бўйича мутахассис.

Ушбу саволга меҳнат ҳуқуқи бўйича мутахассис Муҳаммадамин КАРИМЖОНОВ жавоб берди.

— Ўзбекистон Республикаси соғлиқни сақлаш вазирининг 2015 йил 20 мартдаги 25-сон буйруғига илова “Меҳнатга лаёқатсизлик варақаларини бериш тартиби тўғрисида”ги йўриқноманинг (Ўзбекистон Республикаси Адлия вазирлиги томонидан 2015 йил 17 апрелда рўйхатдан ўтказилган, рўйхат рақами 2667 ) 9-бандига кўра, касаллик ва шикастланганлик бўйича меҳнатга лаёқатсизлик варақаси ёки меҳнатга лаёқатсизлик маълумотномаси меҳнатга лаёқатсиз шахс мурожаат қилган ёхуд даволанган даволаш-профилактика муассасаси томонидан меҳнатга лаёқатсизлик аниқланган КУНДАН бошлаб берилади.

Диққат, эътибор беринг! Касаллик ва шикастланганлик бўйича меҳнатга лаёқатсизлик варақаси ёки маълумотномаси шахс мурожаат қилган КУНДАН ёхуд даволанган даволаш-профилактика муассасаси томонидан меҳнатга лаёқатсизлик аниқланган КУНДАН бошлаб берилади.

Демак, агар ходим тушгача ишлаб, тушдан кейин “больничний” очтирса, шу КУН учун “больничний” тўланади.

Иш куни ёки ўқиш тугаганидан сўнг мурожаат қилинганда, меҳнатга лаёқатсизлик маълумотномаси мурожаат қилинган куни, лекин иш ёки ўқишдан кейинги календарь кунидан озод этилган ҳолда расмийлаштирилади.

ishonch.uz