YouTube tasdiqlanmagan qimor saytlarini mahalliy qonun talablariga javob bermaydigan va YouTube yoki Google tomonidan tekshirilmagan saytlar sifatida baholaydi. Ushbu yangilanish YouTube'ning mavjud siyosatiga asoslangan bo'lib, platforma qoidalarini buzuvchi tashqi saytlarga, jumladan, tasdiqlanmagan qimor saytlariga havola berishni taqiqlaydi.

– Biz tomoshabinlarni nomaqbul saytlar yoki qimor o'yinlari ilovalariga yo'naltiruvchi kontentni cheklash siyosatiga jiddiy yondashmoqdamiz, – dedi YouTube vakili But Bullvinkl. – Shuningdek, kompaniya onlayn-kazinolarni reklama qiluvchi kontent uchun yosh cheklovlarini joriy qilishini ma'lum qildi.

Yangilanishdan so'ng 18 yoshga to'lmagan va tizimga kirmagan foydalanuvchilar onlayn-stavka saytlarini targ'ib qiluvchi kontentni ko'ra olmaydilar.

Qimor kontentiga qarshi kurash

2018 yilda Oliy sud tomonidan AQSh shtatlariga sport qimor o'yinlarini qonuniylashtirishga ruxsat berilganidan beri onlayn-stavkalar ommaviy biznesga aylandi. Shu bilan birga, turli xil onlayn stavkalar, jumladan, saylov natijalariga qo'yiladigan stavkalar ham keng tarqalmoqda.

YouTube'da onlayn-stavkalar va sportga pul tikishlaridan daromad topishni va'da qiluvchi videolar yuz minglab ko'rilgan. Biroq onlayn-stavkalarni tartibga soluvchi qoidalar joylashuvga qarab farq qilishi mumkin. Shu sababli, mutaxassislar millionlab amerikaliklar "jiddiy o'yin qaramligi" xavfi ostida qolishi mumkinligidan ogohlantirmoqda.

YouTube uzoq vaqtdan beri onlayn pul tikish saytlarida kafolatlangan yutuqlar yoki zararlarni qoplashni va'da qiluvchi kontentni taqiqlab kelayotganini ma'lum qilgan. Endi esa platforma o'z siyosatini yanada kuchaytirib, hatto tasdiqlangan saytlardan ham kafolatlangan daromadni va'da qiluvchi kontentni o'chirib tashlashini ma'lum qildi.

YouTube'ning kontent moderatsiyasi siyosati

YouTube'ning bu o'zgarishi platformaning kontent moderatsiyasidagi so'nggi qadamlaridan biridir. Oxirgi yillarda platforma ma'lum turdagi kontentni cheklash uchun maqsadli yondashuvni qabul qildi. Masalan, vaktsinalar va abortlar haqidagi yolg'on ma'lumotlar aks etgan videolar olib tashlanmoqda.

2023 yilda YouTube foydalanuvchilardan sun'iy intellekt tomonidan yaratilgan kontent haqida ochiq ma'lumot berishni talab qila boshladi. YouTube o'z siyosatini yangilashini va 19 martdan boshlab yangi qoidalarni amalga oshirishini ma'lum qildi.

Feruza RAHIMOVA