Milliy statistika qo‘mitasi maʼlumotlariga ko‘ra, 2026 yilning yanvar–aprel oylarida mamlakatimizda yirik korxonalar tomonidan 44,6 trillion so‘mlik oziq-ovqat mahsulotlari ishlab chiqarildi. Bu ko‘rsatkich o‘tgan yilning shu davriga nisbatan 8,2 foizga yuqoridir.

Hududlar kesimida eng yuqori natija Toshkent shahri hissasiga to‘g‘ri kelib, bu erda 7,9 trillion so‘mlik mahsulot ishlab chiqarilgan. Keyingi o‘rinlarni Samarqand viloyati (6 trln so‘m) va Toshkent viloyati (5,9 trln so‘m) egallagan.

Shuningdek, Andijon viloyatida 3,6 trillion so‘m, Farg‘ona viloyatida 3,5 trillion so‘m, Buxoro viloyatida 3 trillion so‘mlik oziq-ovqat mahsulotlari ishlab chiqarilgan.

Qashqadaryo va Namangan viloyatlarida bu ko‘rsatkich 2,7 trillion so‘mni, Qoraqalpog‘iston Respublikasida 2 trillion so‘mni tashkil etgan. Navoiy viloyatida 1,9 trillion so‘mlik mahsulot ishlab chiqarilgan bo‘lsa, Xorazm viloyati hissasiga 1,4 trillion so‘m to‘g‘ri kelgan.

Jizzax, Surxondaryo va Sirdaryo viloyatlarida esa har biri 1,3 trillion so‘mlik oziq-ovqat mahsulotlari ishlab chiqarilgan.