Forum oldidan o'zbekistonlik jurnalistlar Bokudagi yetakchi universitetlardan biri ADA universitetida bo'lib, u yerda tashkil etilgan treningda jurnalistikada sun'iy intellektdan foydalanish, shuningdek, an'anaviy OAVning raqamli transformatsiyasi bilan bog'liq afzalliklar, hamda muammolar muhokama qilindi.

ADA universitetida 5000 nafarga yaqin talaba tahsil oladi va ulardan 300 nafarga yaqini xorijlik. Bu yerda mamlakatimiz va Markaziy Osiyoning boshqa davlatlaridan o'nlab iqtidorli talabalar ham tahsil olmoqda.
2024 yil fevral oyida universitet delegatsiyasi O'zbekistonga tashrif buyurgan. Ular bir necha kun davomida Toshkent va Samarqanddagi bir qator universitetlar, litseylar, davlat va xususiy maktablarda o'zlarining bakalavriat, magistratura hamda tadqiqot dasturlarini taqdim etishgan.
— Universitet professor-o'qituvchilari va talabalari orasida 50 ga yaqin davlatdan vakillar bor. Universitet dunyoning 189 ta yetakchi universiteti bilan hamkorlik qiladi. Bitiruvchilarning qariyb 90 foizi o'z mutaxassisligi bo'yicha ishga joylashmoqda.

Tahsil jarayonidagi ustuvor yo'nalishlaridan biri media tuzilmalarni rivojlantirish, ommaviy axborot vositalari xodimlari va matbuot kotiblari malakasini oshirish hisoblanadi. Ushbu dastur Ozarbayjon OAVni rivojlantirish agentligi bilan hamkorlikda amalga oshirilmoqda, — deydi universitetning korporativ malaka oshirish dasturi menejeri Fotima Isaeva.

Agentlik boshqarma boshlig'i Laman Iskanderova ta'kidlaganidek, Prezident Shavkat Mirziyoevning 2023 yil avgust oyida Ozarbayjonga davlat tashrifi yakunlari bo'yicha imzolangan “Yo'l xaritasi” doirasida agentlik O'zbekiston bilan hamkorlikni faol rivojlantirmoqda, qo'shma media-forumlar, ommaviy axborot vositalari xodimlari delegatsiyalari almashinuvi o'tkazilmoqda.
O'zbekistonlik jurnalistlar Boku davlat universitetining jurnalistika fakultetida ham bo'lishdi. 1920 yillarning oxiridan beri faoliyat yuritib kelmoqda mazkur ta'lim dargohi mintaqadagi eng qadimgi oliy o'quv yurtlaridan biri hisoblanadi.
Uchrashuvda o'zbekistonlik jurnalistlar universitetning jurnalistika fakul'teti professor-o'qituvchilari bilan o'zaro tajriba va fikr almashishdi. Fakul'tetning media markazi va talabalar uchun yaratilgan shart-sharoitlar bilan tanishildi.
Kun davomida hamkasblarimiz Ozarbayjon davlat axborot agentligi — Azertac az tahririyatida ham bo'lishdi.

Zebo Namozova,
ishonch.uz
Ozarbayjon, Boku