“Ютуб” ўзи секин улаб кетди. Аваз Охунни томоша қилдим – кулгили, сифатли. Аммо рейтинги жойида, қизиқчиларнинг етакчиси бўлса ҳам, допинг кулгисининг монтажига ўтириб қолибди. Битта кулги ҳар бир лавҳага усталик билан жойлашган, гўё ҳамма кўзлари ёшланиб куляпти. Кулгини ёпиштириб чиқиш ҳаддан ошиб кетибди. Битта ёки иккита кучли кулги жойини ҳаммага тарқатиб жойлашишяпти. Концертга кириб кузатинг – бунча қаттиқ кулги бўлмайди. Интернетда кўрсангиз гўё ҳамма қотиб қолаётгандек. Шуниси аниқ, ҳатто жаҳоннинг энг машҳури ҳам икки соатдан ортиқ кулдириб тура олмайди!

Тўғри, томошабинларга қизиқтириш учун ғарб киносаноати комедияга кулги овозини сайқаллаб борган. Ҳатто жилмайишга ҳам арзимайдиган лаҳзалар бўлмаса-да, босим билан кулги қўшилган. Қизиқ жиҳати: хориж киносаноати ҳалигача кулгиларнинг овозини ёпиштиришади – аммо бу овозлар эгаларининг аксарияти ўлиб кетишган.

Яна ўзимизга қайтамиз. Ҳожибой Тожибоевнинг дастурларини ҳалигача томоша қиламиз – чунки табиий кулги бор. Бу инсон ўзбек сўз устасининг эталонига айланган! Монтажлаш, сайқаллаш имкони бўлган. Лекин Ҳожибой Тожибоев ўзи кулдирган, борини борича тақдим этган.

Бироқ бизнинг соҳамиз вакиллари “Ютуб” рейтинг пойгасини қувиб, самимий кулгини сунъийлаштиришяпти. Унутманг – ўзбек томошабини аҳмоқ эмас.

Аброр Зоҳидов