11 ноябрь – Ўзбекистон касаба уюшмалари куни муносабати билан тасарруфдаги корхона ва ташкилотлар ходимлари учун Яккасарой спорт соғломлаштириш мажмуасида тадбир ташкил этилди.

Эрталабдан мазкур спорт мажмуаси байрамона безатилиб, 500 нафар ишчи-ходим ва уларнинг фарзандлари қувноқ мусиқалар жаранги остида кутиб олинди.

Ўзбекистон касаба уюшмалари Федерациясининг спорт ва соғломлаштириш бошқармаси ҳамда Тошкент шаҳар спорт бошқармаси раҳбарияти сўзга чиқиб, спартакиада иштирокчиларини яқинлашиб келаётган Ўзбекистон касаба уюшмалари куни билан табриклашди.

Шундан сўнг Яккасарой туман бадиий ҳаваскорлари ва “Ўзбек жанг санъати” ёш спортчиларининг кўргазмали чиқишлари намойиш этилди.

Асосий тадбирларда узоқ йиллар давомида касаба уюшмалари тизимининг спорт йўналишида меҳнат қилган бир гуруҳ фахрийларга “Ўзбекистон касаба уюшмалари спорт фидойиси” кўкрак нишони топширилди.

Тадбир асноси иштирокчилар мусиқа садолари остида оммавий бадантарбия машқларини, 5 минг қадамга юриш шартларини бажаришди. Эътиборлиси, ходимлар ушбу спорт байрамида нафақат ўзлари ва ҳамкасблари, балки фарзандлари ва яқинлари билан бирга иштирок этишди.

– Бугунги спартакиада тадбирига Транспорт назорати инспекциясидан келдик, – дейди шу ташкилотнинг спорт тарғиботчиси Дилшод Охунжонов. – Ишхонамизда касаба уюшмаси билан ҳамкорликда доим шахмат-шашка, волейбол ва стол тенниси мусобақаларини ташкил этамиз. Ходимларимиз жорий йилда Самарқанд ва Хивага зиёратга бориб келишди. Маданий хордиқ чиқаришга эътибор қаратилган жойда иш унумдорлиги ҳам юқори бўлади. Бугунги тадбирлар ҳам иштирокчиларга ўзгача рағбат ва кайфият бермоқда.

Шу куннинг ўзида Касаба уюшмаларига қарашли сузиш ҳавзасида бир неча кундан буён давом этаётган “Сузиш бўйича Ўзбекистон кубоги” мусобақаси иштирокчиларини тақдирлаш маросими бўлиб ўтди. Аснода спартакиадада фаол иштирок этган ходимларга ҳам эсдалик совғалар топширилди.

Зебо НАМОЗОВА

Ishonch.uz