Мутахассислар таъкидлашича, сўнгги йилларда олтин энг даромадли инвестиция йўналишларидан бирига айланган. Марказий банк маълумотларига кўра, 2025 йилда олтин қуймаларининг даромадлилиги 54,5 фоизга етган.

Банк омонатлари ҳам аҳоли орасида талаб юқори бўлган инвестиция турларидан бири саналади. Айрим тижорат банкларида омонатлар бўйича йиллик фоиз ставкалари 22 фоизгача етмоқда.

Шунингдек, квартира, ҳовли ва тижорат объектларига сармоя киритиш ҳамон энг оммабоп йўналишлардан бири бўлиб қолмоқда. Кўчмас мулк кўпчилик томонидан капитални сақлашнинг ишончли воситаси сифатида баҳоланади.

Сўнгги йилларда фонд бозорининг ривожланиши акциялар ва облигацияларга қизиқишнинг ошишига ҳам туртки берди. Бироқ ушбу йўналиш ҳозирча олтин ва кўчмас мулк билан таққослаганда камроқ оммалашган.

Бундан ташқари, кўплаб фуқаролар маблағларини савдо, хизмат кўрсатиш, ишлаб чиқариш ва қишлоқ хўжалиги каби соҳалардаги бизнес лойиҳаларига йўналтиришни афзал кўрмоқда.

Мутахассислар инвестиция турини танлашда эҳтимолий хавфлар, даромадлилик даражаси ва шахсий молиявий мақсадларни инобатга олиш муҳимлигини таъкидламоқда.