Фолбин Чарльз келгусида етук инсон, буюк санъаткор бўлишини, ниҳоятда бойиб кетишини, дунёнинг энг йирик шаҳарларида яшашини, бироқ омонатини топширгач, киндик қони тўкилган уйи яқинига дафн этилишини баён этади. Қарангки, бу башоратларнинг барчаси тўғри чиқади. Коглен, ҳакикатан ҳам, машҳур актёрга айланади, бойийди, Нью-Йорк, Мехико каби шаҳарлардан уй сотиб олади. Аммо 1899 йили Галвестон шаҳрида ижодий сафар чоғи вафот этади. Театр хизматчилари марҳумнинг ҳурматини жойига қўйишади. Уни махсус ясаттирилган ўта мустаҳкам, сув ўтмайдиган тобутга солиб, шу шаҳардаги қабристонга кўмишади.

Орадан бир йилча ўтгач, Америка қирғоқларида офат рўй беради. Мексика бўғозида довул кўтарилиб, Галвестонни сув босади. Шаҳар қабристони ҳам тилсиз ёв исканжасида қолади. Чарльзнинг тобути сув юзасига қалқиб чиқиб, ўн йилдан ортиқ денгиз ва океанлар узра сузиб юради. Охирида тақдир тақозоси билан Муқаддас Лаврентий бўғозига бориб қолади. Уни балиқчилар ушлаб олиб, шу ҳудудга яқин Шаҳзода Эдуард оролидаги ташландиқ уй олдига дафн қиладилар. Тобут сиртидаги ёзувга асосан қабр устига Ч.Коглен деган исм-шарифни битиб қўядилар. Кўп ўтмай, бояги уй машҳур актёр туғилиб-ўсган хонадон эканлиги маълум бўлади. Буни унинг авлодлари бир овоздан тасдиқлашади.

Шундай қилиб, фолбиннинг башоратлари тўла-тўкислигича ҳақиқатга айланади.

Абдунаби ҲАЙДАРОВ