25 ноябрь куни кечқурун Наманганда навбатдаги оғир ЙТҲ юз берди.

Наманган шаҳрида Onix машинаси пиёдалар йўлагидан ўтаётган ЙПХ ходимини уриб кетди. Маълумотларга кўра, ҳодиса 25 ноябрь куни кечки пайт содир бўлган. Навоий вилояти ИИБ ЙҲХБ ходими, 28 ёшли Дониёр Нуруллаев Наманганга соғлиғини тиклаш мақсадида борган. У йўлни пиёдалар йўлагидан кесиб ўтаётган вақтда, уни ҳайдовчилик гувоҳномаси бўлмаган йигит бошқарган Onix уриб кетган.
Ходим олган оғир жароҳатлари оқибатида воқеа жойида вафот этган. Ижтимоий тармоқларда тарқалган маълумотларга кўра, марҳум икки фарзанднинг отаси бўлган.

Эслатиб ўтамиз, 21 ноябрь куни соат 23:00ларда ЙПХ ходимлари Наманган вилояти Давлатобод тумани ҳудудида тегишли ҳужжатга эга бўлмаган ҳайдовчи ходимларга бўйсунмасдан қочишга уринган.

Шу вақтда рация орқали олдинроқда хизмат олиб бораётган катта сержант Ваҳобжон Мўминовга автомашинани тўхтатиш чорасини кўриш юзасидан хабар берилади. Ваҳобжон Мўминов ҳайдовчига тўхташ ишорасини берган вақтда, ҳайдовчи юқори тезлик билан ходимни уриб юбориб, оғир тан жароҳати етказган.

Тезкор ҳаракатлар натижасида транспорт воситасининг ҳаракати чекланиб, ҳайдовчи қўлга олинган.

Афсуски, катта сержант Ваҳобжон Мўминов вилоят касалхонаcида вафот этди.

Ҳозирда барча йўналишларда рейд назорати кучайтирилиб, ҳайдовчи ва пиёдалар томонидан қоидаларга сўзсиз амал қилинишини таъминлаш бўйича кучайтирилган рейд тадбирлари ўтказилмоқда.