Халқаро футбол тарихи ва статистикаси федерацияси (IFFHS) дунёнинг энг кучли клубларининг янги рейтингини эълон қилди.

Унда беш қитъанинг 75 та миллий чемпионати қатнашчиси бўлган 504 та жамоанинг 2023 йил 1 июлдан 2024 йил 30 июнгача бўлган даврда қайд этган натижаларига кўра клублар рейтинги эълон қилинди.

Дунёнинг энг зўр жамоалари рейтингини Европанинг гранд клублари бошқариб турибди. Биринчи поғонада УЕФА Чемпионлар лигасининг амалдаги ғолиби Мадриднинг “Реал” жамоаси бормоқда. Испания грандининг бир йил давомида 371 балл тўплагани қайд этилган.

Янги рейтингнинг дастлабки ўн бир поғонасини фақат “кўҳна қитъа” жамоалари эгаллагани эътиборли. “Реал”дан кейин “Манчестер Сити” (Англия), “Байер” (Германия), “Аталанта” (Италия), “Боруссия” (Дортмунд, Германия), “Атлетико” (Мадрид, Испания), “Бавария” (Германия), “Барселона” (Испания), “Арсенал” (Англия), “Интер” (Италия) ҳамда ПСЖ (Франция) жамоалари ўрин эгаллаган.

Бошқа қитъа вакилларидан энг юқори поғонада Бразилиянинг “Палмейрас” жамоаси жой эгаллади. Мазкур клуб умумий рейтингда парижликлардан кейин 12-қаторда жойлашган.

Осиё клублари орасида энг юқори ўринга Саудия Арабистонининг амалдаги чемпиони, таркибида бир қатор жаҳон футболи юлдузлари тўп тепадиган “Ал-Ҳилол” жамоаси лойиқ топилиб, 40-қаторга ўрнашди.

Криштиану Роналду ўйнаётган “Ал-Наср” жамоаси қитъамизда иккинчи, дунё рейтингида эса 71-ўриндан жой олди.

“Топ-500” рейтингида Ўзбекистоннинг учта жамоаси номи қайд этилган.

Мамлакатимиз клублари орасида “Насаф” (Қарши) 88,25 балл жамғарган ҳолда, жаҳон рейтингининг 201-қаторида қайд этилган бўлса, Наманганнинг
“Навбаҳор” жамоаси 83,75 балл жамғарган ҳолда, IFFHS рўйхатида 221-ўринни эгаллаб турибди.

Тошкентнинг “Пахтакор” жамоаси эса 51 балл тўплаган ҳолда, 496-поғонадан жой олди.

Эслатиб ўтамиз, мазкур учта жамоамиз ҳамда Олмалиқнинг ОКМК клуби ўтган йили Осиё чемпионлар лигасининг гуруҳ босқичида қатнашиб, “Насаф” ва “Навбаҳор” гуруҳдан чиқишга муваффақ бўлган эди…

Акмал АБДИЕВ,
ishonch.uz