Huquqni muhofaza qilish akademiyasida o'tkazilayotgan “Raqamli transformatsiya davrida huquqni muhofaza qilish faoliyatidagi zamonaviy chaqiriqlar va tahdidlar” mavzusidagi xalqaro ilmiy-amaliy konferentsiyada zamonaviy texnologiyalarning joriy etilishi va ularning huquqiy sohadagi ahamiyati keng muhokama qilinmoqda.

Hisob palatasi raisi o'rinbosari Atabek Allaberganovning aytishicha, sohada raqamli nazorat va tahlilni takomillashtirish maqsadida bir qator yirik loyihalar amalga oshirilmoqda.

– Hisob palatasi huzurida “Big Data” texnologiyalari asosida ishlaydigan Masofaviy nazorat markazi tashkil etildi. Bu markaz orqali 110 ta vazirlik va idoralar bilan ma'lumot almashinuvi bo'yicha kelishuvlar tasdiqlandi, shundan 57 tasining 254 turdagi ma'lumotlar bazalari integratsiya qilindi, – dedi Allaberganov.

Hozirda 51 yo'nalishda avtomatlashtirilgan risk tahlillari joriy etilgan bo'lib, shundan 40 tasi amaliyotga tatbiq etildi. Shuningdek, davlat xaridlari bo'yicha qonunbuzarliklarni barvaqt aniqlash imkonini beradigan modullar ishga tushirildi. Joriy yilning yanvar'-may oylarida 3,4 trln so'mlik kamchiliklar aniqlanib, bartaraf etildi. Ulardan 281 holatda 718,2 mlrd so'mlik mablag'ning samarasiz sarflanishining oldi olindi.

Ayni paytda Prezident topshiriqlari asosida sun'iy intellekt texnologiyalarini joriy etish ishlari ham boshlangan. Jumladan, davlat xaridlari sohasida ikki yo'nalish bo'yicha sun'iy intellekt yordamida tahlil jarayonlari avtomatlashtirilib, sinov tariqasida ish boshladi.

Hisob palatasi tomonidan yaratilgan onlayn axborot tizimi orqali byudjet mablag'larining qonuniyligi, maqsadliligi va samaradorligi doimiy monitoring qilib borilmoqda. Rejalashtirilgan 643 ta modulning 544 tasi to'liq ishlab chiqildi, qolganlari ustida ishlar davom etmoqda.

Bugungi kunda ushbu axborot tizimidan 563 nafar vazirlik va idoralar mas'ul xodimlari foydalanmoqda.