Савол: Ассалому алайкум. Ҳозирда долзарб муаммо бўлган ротация ҳақида тўлиқ тушунча берсангиз. Ротация учун ходимнинг розилиги олиниши ёки ходим олдиндан хабардор қилиниши шартми?

Ушбу саволга меҳнат ҳуқуқлари бўйича эксперт Муҳаммадамин КАРИМЖОНОВ жавоб беради.

Меҳнат кодексида “ротация” тушунчаси мавжуд эмас. Меҳнат кодексида “ходимни бошқа ишга ўтказиш” тушунчаси ишлатилади. МК 138-моддасига кўра, ходим айнан ўша иш берувчида ишни давом эттирганда унинг меҳнат вазифаларини ўзгартириш ходимни бошқа ишга ўтказиш ҳисобланади.

МК 139-моддасига кўра, ходимни бошқа ишга ўтказиш қайси муддатга амалга оширилаётганлигига қараб бошқа ишга ўтказиш турлари доимий ва вақтинчага ажратилади.

МК 140-моддасига кўра, ходимни бошқа ишга доимий ўтказишга фақат унинг розилиги билан йўл қўйилади. Ходимни вақтинча бошқа ишга ўтказиш унинг розилиги билан амалга оширилади, бундан ушбу Кодекснинг 145-моддасига мувофиқ ишлаб чиқариш зарурияти ёки бекор туриб қолиниши ҳоллари мустасно.

“Ротация” тушунчаси “Давлат фуқаролик хизмати тўғрисида”ги қонунда белгиланган.

Қонуннинг 39-моддасига (Давлат фуқаролик хизматчисининг ротацияси) кўра, давлат фуқаролик хизматчисининг ротацияси унинг шахсий ва касбга оид сифатларини ривожлантириш, фаолиятининг самарадорлигини ошириш, раҳбар кадрлар захирасини шакллантириш ҳамда коррупсиявий хавф-хатарларнинг олдини олиш мақсадида амалга оширилади.

• Давлат фуқаролик хизматчисининг ротацияси уни эгаллаб турган давлат фуқаролик хизмати лавозимига тенг бўлган бошқа лавозимга ўз розилиги билан ўтказиш орқали амалга оширилади.

Давлат фуқаролик хизматида коррупцияга оид ҳуқуқбузарликларнинг олдини олиш мақсадида мажбурий равишда ротация қилиниши лозим бўлган давлат фуқаролик хизмати лавозимларининг рўйхати белгиланади. Ушбу лавозимларни эгаллаб турган давлат фуқаролик хизматчиларининг ротацияси уларнинг розилигисиз амалга оширилади.