Ushbu konferentsiya 30 dan ortiq davlatdan kelgan 100 dan ziyod ekspertlarni — yetakchi olimlar, amaliyotchi mutaxassislar, sohaviy tashkilot va muassasalar vakillarini birlashtirdi. Konferentsiyada Huquqni muhofaza qilish sohasida fan va ta'lim, zamonaviy yondashuvlar va chaqiriqlar, raqamli kriminalistika va tergov faoliyatini tashkil etishning yangi usullari, raqamli davrda korrupsiya, jinoiy daromadlarni yuvish va terrorizmni moliyalashtirishga qarshi kurashish masalalari muhokama qilinmoqda.

Korruptsiyaga qarshi kurashish agentligi direktori Akmal Burxonov:
–O'zbekistonda so'nggi yillarda raqamlashtirish jarayonlari keng qamrovli tarzda va shiddat bilan amalga oshirib kelinmoqda. Elektron hukumat, davlat xaridlarining avtomatlashtirilgan platformalari, onlayn reestrlar va raqamli xizmatlar nafaqat ma'muriy jarayonlarni soddalashtirdi, balki ochiqlik va hisobdorlikni ta'minlashning muhim vositasiga aylandi.Biroq, raqamli infratuzilmaning kengayishi bilan birga, yangi xavf-xatarlar ham yuzaga kelmoqda. Masalan, korrupsion harakatlar yangi texnologik muhitga moslashmoqda, korrupsiyaning an'anaviy huquqiy ta'riflarga ega bo'lmagan yangi shakllari paydo bo'lmoqda. Bu holat nafaqat texnik yechimlarni, balki korruptsiyaga qarshi kurash konseptsiyasini ham qayta ko'rib chiqishni taqozo etmoqda.

Bugungi kunda kibermakonda axborot-kommunikatsiya texnologiyalaridan foydalangan holda amalga oshirilayotgan yangi formatdagi korrupsiyaviy harakatlarning guvohi bo'lyapmiz. Bunday harakatlar orasida avtomatlashtirilgan tizimlarda ma'lumotlarni soxtalashtirish, dasturiy algoritmlarga noqonuniy aralashuv, davlat xaridlarida raqamli til biriktirishlarni amalga oshirish, elektron izlarni yo'qotish, xizmat vakolatlaridan foydalanib qarorlarga ta'sir qilish kabilar shular jumlasidandir.

Bundan tashqari, tahlillar, raqamli korruptsiyaning transmilliy tus olayotganini ham ko'rsatmoqda. Masalan, offshor platformalar, anonim kriptohamyonlar, sun'iy intellekt yordamida soxta ma'lumotlar tarqatish, korrupsiya sxemalarini avtomatlashtirish orqali amalga oshirilayotgan harakatlarni sanab o'tishimiz mumkin.

Shu bois, O'zbekistonda ham "kibermakonda korruptsiya"ga qarshi tizimli yondashuvlarni ishlab chiqish ishlari boshlandi.
Xususan, O'zbekiston Respublikasi Prezidentining 2025 yil 21 apreldagi Farmoni bilan kibermakonda korruptsiyaga qarshi samarali mexanizmlarni yaratish vazifasi belgilandi. Mazkur vazifa ijrosi doirasida maxsus normativ-huquqiy hujjatlar loyihalari ishlab chiqilmoqda.