Xo'sh, ishda sababsiz bo'lmagan xodimni jazolash mumkinmi?

Samarqandda O'zbekiston kasaba uyushmalari Federatsiyasining “Sayyor qabuli”da Federatsiya raisi o'rinbosari, mehnat inspektsiyasi boshlig'i Qobiljon Qirg'izaliev, yuridik bo'limi mudiri Hamidulla Primqulov hamda murojaatlar bilan ishlash bo'limi mudiri Guzal'ya Rizaeva ana shunday ko'plab savollarga javob berishdi.

Garchand Mehnat qonunchiligida “Progul” jazo choralari qo'llanilishi ko'zda tutilmagan ersa-da, korxona yoki tashkilotning ichki mehnat tartibiga “progul”ga oid band kiritilsagina, jazo chorasini qo'llash mumkin ekan. Aks holda, ishga uzrli sabablarsiz kelmagan xodimga jazo chorasi qo'llab bo'lmasligi bo'yicha tushuncha berildi. Shuningdek, tadbirda Nurobod tuman Sanitariya-epidemiologik osoyishtalik va jamoat salomatligi markazi boshlang'ich kasaba uyushma tashkiloti yetakchisi O'lmas Tog'aev ko'targan muammoga ham yechim topildi.

Ma'lum bo'lishicha, sohada 14 yil ishlagan xodim salkam 8 yil mehnat ta'tilida bo'lmagan. U boshqa ishga o'tganida ish beruvchi tomonidan o'tkazib yuborilgan ta'til yillariga kompensatsiya to'lovi to'lab berilmagan. Bu holatga fuqarolik ishlari bo'yicha tumanlararo sud tomonidan muddati o'tib ketgan deya rad javobi berilgan.

Kasaba uyushma vakillari ushbu holatga qonuniy baho berilmaganligi ish xaqiga nisbatan da'voda muddat belgilanmaganligini qayd etishdi.

Muloqot davomida mehnat qonunchiligidagi o'zgarishlar, ijtimoiy sherikchilikni asoslantirishga doir qator masalalar yechimi haqida ham tushuntirishlar berildi.

Nurilla ShAMSIEV,
ishonch.uz