Жумладан, Ўзбекистон касаба уюшмалари Федерациясининг халқаро касаба уюшмалари ҳаракатида тутган ўрни ва нуфузини ошириш, нуфузли халқаро касаба уюшмалари бирлашмалари билан ҳамкорликни кучайтириш соҳасида аниқ мақсадга қаратилган ишлар амалга оширилди.

2024 йилнинг декабрь ойида бўлиб ўтган ХКУКнинг навбатдаги Бош кенгаши мажлиси қарори билан Ўзбекистон касаба уюшмалари Федерацияси дунёдаги энг йирик касаба уюшмалари бирлашмаси аъзолигига 80 фоиздан ортиқ овоз билан қабул қилинди.

Халқаро касаба уюшмалари конфедерацияси (ХКУК) (International Trade Union Confederation, ITUC) – дунёдаги энг йирик касаба уюшмалари бирлашмаси ҳисобланади. У ўз сафларига 163 мамлакатдан 200 миллион нафарга яқин аъзони бирлаштирган, унга аъзо ташкилотлар сони 340 та.

ХКУК 2006 йилда Халқаро мустақил касаба уюшмалари конфедерацияси ҳамда Халқаро меҳнат конфедерациясининг бирлашиши ҳисобига таъсис этилган. Таъсис конгресси 2006 йилнинг 1-3 ноябрь кунлари Вена шаҳрида бўлиб ўтган.

Бугунги кунда ташкилотнинг Бош котиби – Люк Триангл. Шуни алоҳида таъкидлаш керакки, Халқаро касаба уюшмалари конфедерацияси Бош котиби раҳбарлигидаги юқори мартабали миссия 2024 йилнинг октябрь ойида мамлакатимизда бўлиб, Ўзбекистон касаба уюшмалари Федерациясининг турли соҳа ходимларининг ижтимоий-иқтисодий манфаатларини таъминлаш, ижтимоий шерик­лик ва ижтимоий мулоқотни ривож­лантириш борасидаги фаолияти билан яқиндан танишиб чиққан эди.

Конфедерация Халқаро Меҳнат Ташкилоти, Европа Иттифоқи Комиссияси, Халқаро валюта жамғармаси, Жаҳон банки ва бошқа халқаро ташкилотлар билан яқиндан ҳамкорлик қилиб келади.

Ўзбекистон касаба уюшмалари Федерациясининг Халқаро касаба уюшмалари Конфедерациясига тўлақонли аъзоликка қабул қилиниши юқоридаги халқаро тузилмаларда Ўзбекистоннинг мавқеини илгари суришда Конфедерация салоҳиятидан фойдаланиш, Ўзбекистоннинг Халқаро Меҳнат Ташкилоти ҳамда бошқа халқаро ҳамкор ташкилотлардаги мавқеини мустаҳкамлаш учун қўшимча имкониятлар яратади.