1985-1990 yillarda sanatoriy-profilaktoriy hududida ulkan yer parmalash ishlari olib borilib, minerallarga boy yer osti ma'danli suvi borligi aniqlandi. Bu izlanishlarning samarasi o'laroq, 795 metr chuqurlikdan 56 darajali, issiq termalli, shifobaxsh yod-bromli, xlorid-natriyli, issiq azot va yengil ishqorli tuzdan iborat ma'danli suv chiqarilishiga muvaffaq bo'lindi.

Ma'danli suv tarkibi jihatidan Gruziyada chiqarilgan “Lugela”, Ukrainaning “Truskovets-Naftusya suvlari qatoridan o'rin oldi. 1999 yilda sihatgoh O'zbekiston kasaba uyushmalari Federatsiyasi Kengashi tasarrufiga olinib, 80 o'ringa mo'ljallangan bal'neologik sanatoriysi qurilgan edi.

Xalqimizning talab va ehtiyojlarini inobatga olib, bugun bu yerda barcha qulayliklarga ega, zamonaviy 200 o'rinli yangi 3 qavatli bino kompleksi foydalanishga topshirildi. Inshoot 6 ta korpusdan: ma'muriyat, yotoq binosi, davolash bӯlimi, madaniyat saroyi va kutubxona, oshxona, basseyn-saunadan iborat.

Sanatoriy asab, yurak qon-tomir tizimi, ginekologik, tayanch-harakat kasalliklariga ixtisoslashtirilgan.

Mazkur nodir, zamonaviy, hozirgi zamon arxitekturasi talablari asosida qurilgan inshoot xalqimizga, xususan Orolbo'yi mintaqasida yashovchi yurtdoshlarimizga O'zbekiston Respublikasi davlat mustaqilligining 33 yilligiga munosib bayram sovg'asi bo'ldi.

Tantanali ochilish marosimida O'zbekiston kasaba uyushmalari Federatsiyasi rahbariyati, Oliy Majlis Senati va Qonunchilik palatasi, Respublika Ma'naviyat va ma'rifat markazi vakillari, Xorazm viloyati va Xonqa tumani hokimliklari mas'ullari, xalqimiz ardog'idagi yozuvchi va shoirlar, san'at va madaniyat namoyondalari, jamoat arboblari, mehnat faxriylari, taniqli sportchilar, kasaba uyushmasi faollari, hamda ommaviy-axborot vositalari xodimlari ishtirok etdi.

Tadbir so'ngida yig'ilganlar sanatoriyning barcha xonalarini aylanib, yaratilgan shart-sharoitlarni ko'zdan kechirdilar, shuningdek, maskanga Federatsiya tomonidan yengil mashina hamda mikroavtobus sovg'a qilindi.