Namanganda fel'dsherlarga 370 million so'mdan ortiq ustama pullar undirildi
Namangan viloyatida tez tibbiy yordam markazining 15 nafar fel'dsheri foydasiga sud qarori chiqarildi. Unga ko'ra, tibbiyotchilarga umumiy hisobda 370 million 170 ming so'm miqdorida ustama puli undirib beriladigan bo'ldi.
Ma'lumotlarga ko'ra, ushbu tibbiyot xodimlari 2022 yil 1 noyabrdan buyon Respublika tez tibbiy yordam markazi Namangan filialida reanimatsiya brigadasi fel'dsherlari sifatida ishlab kelgan. Vazirlar Mahkamasining 2005 yil 21 dekabrdagi 276-sonli qaroriga muvofiq, ularning lavozim maoshiga sog'liq uchun xavfli va mehnat sharoiti og'ir bo'lgani uchun 25 foizli ustama to'lanishi kerak edi.
Biroq Namangan filiali tomonidan bu talab bajarilmagan. O'zbekiston sog'liqni saqlash xodimlari kasaba uyushmasi Namangan viloyati kengashi ushbu holat bo'yicha sudga murojaat qildi.
Dastlab tumanlararo sud da'vogarning talabini rad etgan bo'lsa, apellyatsiya tartibida ish qayta ko'rib chiqilib, adolat qaror topdi — fel'dsherlarga ustama pullari undirib berilishi haqida ajrim chiqarildi.
Kasaba uyushmasi ma'lum qilishicha, tashkilot xodimlari ishchi va xizmatchilarning qonuniy manfaatlarini himoya qilishda faol ishtirok etishni davom ettirmoqda.
Anvarjon HALIMOV,
“ISHONCH”
Maqolaga baho bering
0/50
0
0
0
0